NPF Central-i maneni okadak raratsü; Rio & Zeliang nati NPF raksatsü

Kohima, August 28 (Agencies): Naga People’s Front (NPF) Central-i party anema nokdakba MLA tem aser ano Lok Sabha MP Neiphiu Rio Tir sür NPF Party tentetba anema okadak ken o benoka aliba atema maneni raratsü.
“Onoki ozüng dak amanger kechiyong onok ket nung kuli aser tezülubatem lir aser maneni okadak raratsü” ta Central Office nung NPF Central otongdar, Achumbemo Kikon-i metetdaktsü.
Tang NPF-i tamaitsü noksa amshiba antebong ya 1964 küm mezüng Democratic Party of Nagaland (DPN)-i amshi aser iba ya Naga nunger taginüba sayutsü nükjidong nung amshitsü tenzük. Iba tamaitsü noksa ya Centre aser Naga telungpurtem tsüngda yimjung bener arutsü atema amshi aser iba küm election nung toktepdang menden 12 nung takok angu, ta Achumbemo-isa ashi.
September 6, 1964 nü India sorkar aser Naga telungpur teloktem tsüngda cease fire tenangzüktep mezüngbuba agi aser iba jagi taoba regional party (DPN) züngsemtemi resign asü.
“Naga nunger taginüba atema bendanga agüja inyaktsü asoshi an tebong party adok. Tang tashi nung an tebong party indang nomenclature 9 ben tashi melenshiogo saka alizüng, teinyaktsü, tangatetba aser party wako kasa dang lir” ta Achumbemo-isa shisem.
Rio-i aniba NPF teloki NPF Central Tir Dr Shürhozelie Liezietsu-i antebong party tentetba nung shilem kecha mali ta ashiba atema Achumbemo-isa ashiba agi, ‘NPF lennir tejentibaji Dr Shürhozelie lir aser pai 1969 küm DPN candidate ka ama toktep.’
1998 küm Election Commission-i party (taoba Naga Peoples’ Council) indang antebong maitsü sota ayu. Naga nungeri ashiba tashi angaa general election nung shilem magii mokdangba atema EC-i maitsüji sota ayutsüsa aküm.
Ajisüaka, 1999 küm Dr Shürhozelie-i antebong maitsü meyipa angutsü atema Lok Sabha elections nung Independent candidate ka ama toktep. 1998 küm assembly nung Congress MLA 59 liasü aser pai takok mangutsü ta meteta dang liasü saka party tamaitsü noksa meyipa angutsü atema Parliamentary election nung pai toktep.
Neiphiu Rio aser Chief Minister T R Zeliang na den tang NPF nungi anenja aliba MLA temi 2002 nungang regional party nung aden. NPC nungi Nagaland People’s Front (NPF) ta melenba sülen ang parnok aden, ta Achumbemo-isa metetdaktsü.
Rio aser Zeliang nati Congress toktsüba sülen NPF-i tena yimtenren wadang nung teyari agütsü ta tenati bilemtettsüla saka tenati tang NPF ashioktsüogo. NPF-i mapang tajung aser tamajung ajak nung Naga nunger atema nokdaker inyaka aruogo aser Rio-Zeliang aser telok ama political tourists aser teti party toktsürtemi NPF ketdangsüa aotsü makok.
2018 state general election matongdang Naga yimten tebilemtsü asoshi telemtetba ka agitsübaji NPF indang tongtipangtiba teinyaktsü lir. Telemtetbaji agira, NPF-i election nung tokteptsü renema lir kechiyong tang adoka aliba onük ajanga party merüktetogo, ta NPF otongdarisa ashi.
Osangbener senden nung NPF Central Vice President, Zeku Tsukru-ia “Rio aser Zeliang nati regional Party tajung nungi sen aser tashi aginüba party ka kümdaktsü” ta ashi.
“Naga maitsü kümzüka ayutsü atema party tentet saka tenati sen aser tashi indang party ka kümdaktsü saka tang iba tangatetbaji mali kechiyong tena NPF party nung joko maden” ta Zeku Tsukru-isa ashi.
Rio aser Zeliang na anioktsü atema 2002 küm NPC indang nomenclature ji NPF ta melen, anungji nomenclature melenba kija agi tena regional party tejentiba tenzükertem rongnung adentsü makok, ta paisa shisem.