NPF Central Party lennirtemi Dr. Shürhozelie pusemer

Dimapur, July 17 (TYO): Naga Peoples Front (NPF) nung Central Party lennirtem July 17, 2017 nü rongdak senden ka jatepa amen. Iba senden nung Central office bearers aser Frontal ajak nung züngsemtem aden, ta Recorder, S. Akho Leyri-i sangdong ka nung metetdaktsü.
Sendenji nikongdang 4:00 ako nung Working President & Advisor (Political) to the Chief Minister, Apong Pongener menden ser amen aser bangzüng ka renem, ta sangdong nung shia lir.
Senden nung Central Office Bearers aser frontal ajak nung züngsemtemi tang ajurua aliba tensa nung Party President aser Chief Minister, Dr. Shürhozelie Liezietsu pusema nungittsü ta lemtetba nungi masetshii nokdaktsü ta bangzünga renem, ta S. Akho-isa sangdong nung metetdaktsü.
Senden nung DAN Chairman, Kuzholuzo Nienu-i tayongzükba o jembidang, “Tang asenoki ajurua aliba tensa nung asenok kanga shisadangtsüla aser züngsemtemi tensa tamajungba mekümdaktsütsü atema tajungtiba agi inyaktsüla. Lennir tajung ka akümtsü atema tasütait aser ochishiba nüngdaker. Anungji, nübortem len anitsü atema nisung ka dak ibaji alitsüla” ta ashi.
Paisa züngsemtem dang tasü aittsü aser ochishia alitsü ayongzük aser lennir kaji jangratema aliba mapang masü saka khuret ajurudang ang tendangteter, ta ashi.
Asenoki takok angutsü atema dang masü saka ajaki mulunga telemtetba agitsü atema bilema inyaksangshitsüla ta Kuzholuzo-isa ashi, ta sangdong nung shia lir.
Senden nung NPF Vice President, Pusazo Luruo-ia tajungshi o jembi aser telok ajaki sarasadema tembang, ta S. Akho Leyri-isa metetdaktsü.