NPF central team-i anir Mkg dist kübok constituency-tem sema jajar

Chuchuyimlang yimdak telungjem senden ka mener külen NPF Working President & Advisor to CM Huska Yepthomi den party ketdangsürtem külemi noksa nung angur. Mokokchung, May 10, 2017

Mokokchung, May 10 (TYO): May 9 nungi tenzüka Naga People’s Front Working President & Advisor to Chief Minister (Political) Wb. Huska Yepthomi-i anir külem NPF central office telen balala nungi aser NPF Mokokchung Division ketdangsürtemi Mokokchung district kübok constituency-tem sema party tenzükertem den telungjem senden kayonga jajadaki.
Tanü Huska Yepthomi-i senden ka nung jembidang, iba telungjem senden ya tongtibangsa tang sorkar jenjang, tia aser inyakyim balala party tenzükertem dang lemsateptsü nükjidong nung constituency balala semyonga jajar, ta ashi.
Paisa ULB election indang onük kar süokdang, sorkari nübur den tongtepratep magii kecha meinyaker asünung, iba dak sentakba nung kin balala lenirtem jaoka telungjem senden 14 ben tashi menogo aser parnoki municipal act nung mapetbatem yanglushitsü ashiba ama, itemji yanglushir külen sorkari election agitsü sangdong, saka tesülen ano Naga nunger sobaliba tzüzüng ozüng (Naga customary law) bener arua ULB election nokdanga liasü, ta kuli kar ashi.
“Amajok nung office aser ki aika raksabaji Naga nunger sobaliba ozüng asü?” ta paisa asüngdanga ashi. “Naga customary law tenüng amer asangur chanu ana tashi taküm laluogo, nisung kari pei ajung asaa inyakdang nüburtem kanga timatemer”, ta paisa shisem.
Aji oda, Supreme Court-i mashi mapang ka nung ULB election dak sentakba nung obendang agütsütsü, saka yakta agütsütsü imlar, ta paisa ashi. Asenok India kübok ali tashi India nunger temzüng kübok alitsüsa akümtsü, ta paisa ashi.
Paisa Arla 371 (A) indang jangjashitsüdang, iba arla ya tim masü ta sür Naga nungeri anem meso, iba arla dak sentakba nung taküm aika laluogo, saka tanübo kin telungjem (tribal hohos) lenirtemi iba arlaji kümzüka ayutsü meranger, “Naga nungeri bendanga agütsüba mapa ajak kin hoho lenirtemi samatsüogo, anungji, parnokji Naga nunger anemertem lir”, ta paisa aitsü.
Naga nunger nem statehood agütsüba ya tatembang masü ta India sorkari meteta lir, iyongjiang yimjung kishi (ceasefire agreement) lapoka keno jembir. India sorkari arla 371 (A) dang nungi alia asenok nem jenjang agütsünür, saka asenoki arla 371 (A)-ji dang kümzüka ayutsü meranger, ta paisa ashi.
Paisa taoba Nagaland CM aser tang MP teinyakdak Neiphiu Rio mapa aitsüdang, cabinet menden atatsü teimla nung pa MP election nung toktep saka kecha mata, anungji, pai tanaben state-i arua T.R Zeliangi aniba sorkar raksatsütsü aiben merangogo, saka Tsüngremi ibaji mataloktsü, kechiyong “nübur olaji Tsüngremer ola lir”, ta paisa kuli kar dena ashi.
“NPF ya political party ka dang masü saka ibai nübur arakzüba (people’s movement) ka lir”. Congress nung tongti lenirtem aser tulur aika NPF nung denogo, parnok adenba kuliji tanga kecha masü saka party nükjidong aser inyakyim nungittsü tangatetba nung adenba lir, ta paisa ashi.
“Nagaland nung Naga nunger asoshi telemtetba tajung bener arutsü asoshi NPF dak dang teimla ajak lir”, ta ashi. Aji oda, “Congress party-ji samadaki aser BJP-jia asenok den lir saka asenok BJP den adenba masü”, ta paisa ashi. “BJP den tembarbo alitsü aser friendly match-bo asayatsü saka mendenbo melemsateptsü”, ta paisa jangjashitsü.
Sentong temer külen osangbener senden ka alidang, “Party tsüngda telemsa alibaji karibo jembitsü akok aser kija karbo party nungia atsünga aotsü akok, saka tang tashibo onok tsüngda yamaji loksatsüsa meputepba kecha mali”, ta iba osangbeneri asüngdangba ka langzüa ashi.
“Taruba election nungji regional party tasen kar adoktsü imlar asü?” ta metetnüa asüngdangdang, “Nephiu Rio-i anir party tasen ka tenzüktsü ta yimdong nung olulu jembiba angashir, saka iba jagi NPF party nungbo kecha tapok mapatsü”, ta ashi.
May 9 nü assembly constituency pungu; 24 Angetyongpang, 25 Mongoya, 26 Aonglenden, 27 Mkg town, 28 Koridang den Ungma yimdak aser 23 Impur constituency pur den kasa telungjem senden Kobulong nung mena liasü. May 10 nü 21 Tuli constituency pur den Tuli nung aser 22 Arkakong pur Chuchuyimlang yimdak menogo. May 11 nü par telokisa 29 Jangpetkong aser 30 Alongtaki A/C pur den kasa telungjem senden ka Mangkolemba nung amentsü ayongzüka lir.