NPF Central Youth Wing-i anogo 10 buba lungak ait

Kohima, November 3 (TYO): Tanü agi anogo 10 buba Naga People’s Front (NPF) Central Youth Wing-i State Civil Secretariat kima nung lungkak aitogo.
Tanü MLA Yitachu-i o jembidang, “Acharya ya Nagaland Governor inyaktsü meshimdang RSS tanishir tajung ka liasü aser pai küm 50 tema Hindutva ajungketba mapa nung shielem agia aru” ta ashi.
Nagaland nung Governor ama inyakdang Acharya-i mapa tulu meinyaktet mesüra BJP MLA tem anir marutet. Aji agi, pai NPF sasep nung mepetmesü ken o adokba nung maongka agia mapa inyaker aser Linük Temzüng alema pai Nagaland nung BJP sorkar ka akümtsü meranger, ta Yitachu-isa metetdaktsü.
“Democracy ka nung majority agidangbo mapa meinyaker saka ozüng lateta alibatem sülen anidaktsüla. Ajisüaka, Governor-i ozüng alema mapa inyakba ajanga Naga nungertem mashileni anitsü meranger” ta paisa shisem.
Nagaland nungi ochimashi agientsü atema Acharya-i jembir saka NPF nungi meindokba aser anenja aliba MLA tem nem sorkar kümdaktsübaji ochimashi inyakyim tulutiba lir aser iba nung Governor-ia shilem agiogo, ta Yitachu-isa aitsü.
Taoba Chief Minister Dr Shurhozelie Liezietsu-i aniba sorkar anendaktsüba sülen T R Zeliang-i aniba sorkar kümdaktsüba ken o atema okadaki ochi obendang agütsütsü imlar. Maneni NLA Speaker-ia tekaratiba nung onoki benokba petition agizüktsü mesüra magizüktsü atema telemtetba ka agitsüla, ta paisa metetdaktsü.
Lok Sabha Neiphiu Rio-i aniba teloki ozüng alema mapa inyaksangshiba atema tsübua bilemba agi parnok pusemertem ajak October 28 nungi Kaziranga, Assam-i anir lua puoka lir aser külen State Cabinet ajunga Delhi nung oa mungzüka lir, ta Yitachu-isa metetdaktsü.
Tang lungkak aitba sentong ya temeten mangutsü tashi agitsü, ta paisa shisem.
Tanü NPF Youth Ambassador, Imtibenla Wati-i o jembidang, “NPF nungi razüka aoba MLA temi tashi aser sen aginüba atema party züngsemtem aser Nagaland nung alirtem ashioktsüogo” ta ashi.
“Kechiba parnoki lanuputu anidakdaktsütsü asoshi inyakyim tamajung tenzüka toktsür?” ta laisa asüngdang.
Imlibenla-isa NPF züngsemtem dang Shurhozelie Liezietsu lenisüba kübok anidaktsü kechiyong tatem nung ochii takok angutsü ta ayongzük.
Tawa NPF nung adenba Ex-Congress MLA, Azu Keyho den NPF general secretary Anungba Imsong nati lungkak aitertem ayongzüka o jembi.
NPF Central Youth Wing-i ashiba agi, asüng aser Deobar public sodi anogotem asü nung November 6 nungiang lungkak aitba sentong agitsü.