NPF Central Youth Wing-i anogo tenetbuba lungkak ait

Kohima, October 31 (TYO): State Assembly Speaker Imtiwabang Aier-i Naga People’s Front (NPF) sasep nung mepetmesü adokba ken o angadangtsü tenzükaka, NPF Central Youth Wing-i tanü agi anogo tenetbuba Civil Secretariat kima nung mener lungkak aitba sentong agiogo.
Taoba Speaker, MLA Chotisuh Sazo-i tanü tesentepertem den o jembidang, Speaker-i Chief Whip Kiyanilie Peseyie liaka, ozüng alema TR Zeliang indang whip agizük aser ibaji Linük Temzüng nung Tenth Schedule aser NPF constitution alema inyakba liasü, ta ashi.
“Speaker-i whip ana agizükba agi tanü asenoki obang meputep ken o tem ajuruogo. Pai Linük Temzüng sülen anidak asübo, asenoki iba lungkak aitba sentong ya magila” ta Sazo-i ashi.
Speaker-i ozüng alema TR Zeliang indang whip agizükba sülen tanü MLA 9 anema disqualification petition benoka angadangogo. Onok MLA 9-i kechi ajurudir ajuruaka agizüktsü renema lir. Onoki aibelena inyaka alinungbo pai onok merenshitsü akok aser parnoki onok Linük Temzüng nungi disqualify sütsüyonga tsübua mali, ta paisa shisem.
Asür MLA Kiyanilie Peseyie asüba ajanga disqualification ken o benoka mangatet ta Speaker-i ashir saka pa süadok nunga ken o jibo magien lir aser iba atema MLA Yitachu-i October 3 nü pai asür Peseyie melenzüker ta shidi züluogo, ta Sazo-isa metetdaktsü.
Shitakba agibo Speaker-i application anguba sülen anogo 10 tsüngda mapa inyaktsüla saka tanü tetuyuba ka agütsüba nung October 27 nungang petition ji agizük ta shia lir, ta paisa ashi.
MLA Yitachu-ia o jembidang, tang Speaker-i mapa kar inyakbaji nübortem tsüngdang tenüng tajung agitsü merangerba dang lir, ta ashi.
“Speaker kati yamai mapa meinyaktsüla kechiyong nübortemi ozüngi melaba ama sorkari inyaker asü masü ta metetnür. Ozüng alema akümba sorkarji mapa inyaka moudaktsütsü aser talisa Nagaland ama state ka nung India sorkar aser Naga yimten teloktem tsüngda olemtep aliba mapang ka nung ozüng alema akümba sorkar ka mayutsüla” ta paisa metetdaktsü.
Tanü NPF CEC Member Povotso Lohe aser Mon Division President L Yalong Konyak natia o jembi.