NPF Central Youth Wing-i India Tir dangi shidi zülu

Kohima, November 1 (TYO): Naga People’s Front (NPF) Central Youth Wing-i anogo tibuba Civil Secretariat kima nung India Tir dang Nagaland Governor meyipa ajatsü aser Assembly Speaker-i ozüng alema mapa inyakba ajitettsü atema takhangba agüja lungkak aitogo.
Tanü NPF Central Youth Wing President V. Nihoshe Swu aser Working President Bendangtoshi Nagaland nati Chief Secretary Pankaj Kumar ajanga India Tir Ram Nath Kovind dangi shidi ka zülu.
Governor P B Acharya-i July 19 nü ozüng alema Dr Shurhozelie Liezietsu-i aniba NPF sorkar anentsü aser ghonda ishika tsüngda NPF nungi züngsem agiena aliba MLA TR Zeliang’er sorkar kümdaktsü, ta shidi nungji zülua lir.
Governor-i July 21 nü Assembly indang floor test alitsü jazük aser iba nung NPF-i taoba Chief Whip Kiyaneilie Peseyie ajanga T. R. Zeliang-i benokba motion anema vote agütsütsü Whip ka agütsü. Ajisüaka, Speaker medeni party Whip-i ashiba mangai NPF MLA 35-i Zeliang pusema vote agütsü, ta NPF Youth Wing-isa metetdaktsü.
Iba nungji ajemdaker NPF party-i Speaker tsüngda MLA 36 anema disqualification petition ka benok. July 21 nü party Whip-i ashiba mangaba atema iba ken o benok saka tanü tashi NLA Speaker-i iba atema mapa kecha meinyak lir, ta parnokisa shisem.
Ano külen, Speaker-i India Linük temzüng nung lateta aliba ama mapa inyaktsü melena, tatemtsütem dang agüja pai ozüng alema mapa inyaksangshir. Nagaland nung India Linük Temzüng mapa küma mamshir, ta NPF Youth Wing-isa shidi nung shia lir.
Speaker-i NPF MLA 36 anema disqualification petition benokba atema mapa meinyakba, asür Keyaneilie Peseyie melena NPF party indang Chief Whip shimba magizükba aser NPF Legislature Party indang Leader magizükba ajanga NPF Youth Wing-i tejashi sayua Nagaland Civil Secretariat jakdang timi lungkak aittsüsa aküm, ta parnokisa shisem.
Iba dak sendakba nung Tir office-i tangsatang Governor P B Acharya mapa nungi anentsütsü aser NLA Speaker-i tim mesüi inyakba ken o agizüktsü mepishir, ta NPF Youth Wing-isa shidi nung ashi.
Tanü NPF Central Youth Wing vice president Achamo Kikon-i India Tir dangi züluba shidiji telok dang zünga metetdaktsü.
Tanü MLA Yitachu, NPF Minority Wing President Bishnu Bhattacharjee aser NPF Mon Division President Akavi nungertemia o jembi.