NPF Central Youth Wing-i lungkak aitba anena atar; NPF General Convention sülen tenzüktsü

Kohima, November 9 (TYO): Dr Shurhozelie Liezietsu lenisüba kübok Naga People’s Front (NPF) nungi Central Youth Wing-i hopta ana dak tali lungkak aita aruba sülen tanü anenogo.
Central office-i parnok dang mepishiba atema Youth Wing-i lungkak aitba sentong anena atatsü telemtetba agi.
October 23, 2017 nungi NPF Central Youth Wing züngsemtemi State Civil Secretariat kima nung mener lungkak aitba sentong tenzük aser parnoki anogo pezü- October 28-29 aser November 4-5 nung sodi agiba dak alaka tanü tashi lungkak aitba sentong agiyonga aru.
“November 22 nü Kohima nung party general convention agitsü aliba atema NPF Central office-i onok dang lungkak aitba sentong anena atatsü mepishi” ta NPF Central Youth Wing, Vice President, Achamo Kikon-i tanü ashi.
“Onoki lungkak aitba manener, saka convention atemba sülen onok nem temeten magütsü tashi lungkak aitba sentong agitsü. Assembly Speaker Imtiwapang Aier-i NPF Chief Whip shimba, NPF Legislature Party Leader agizükba aser Chief Minister T R Zeliang-i anir telok toktsüba NPF MLA 36 anema disqualification petition benoka aliba ken o tem atema oshidang magütsü tashi onoki lungkak aittsü” ta Achamo Kikon-isa ashi.
“Onoki anogo 14 tashi lungkak aityonga arudang, onoki osang tejangjatem metetdaktsüogo aser iba ajanga Speaker indang office-i tangatetba ka angutsü ta onoki imlar” ta MLA aser Democratic Alliance of Nagaland Chairman, Kuzholuzo Azo Nienu-ia ashi.
MLA tem tsüngda obang meputepba ajanga 12 buba State Assembly ya mepetmesü agi sünga lir. Ajisüaka, lennirtem dak tatok agütsüba tangatetba alitsüla, kechiyong meimchiri dang aibelener, ta paisa shisem.
Azo-i Lok Sabha MP aser taoba Chief Minister Neiphiu Rio aser tang teinyakdak Chief Minister TR Zeliang na den dena aliba MLA aser party lennirtem den putepshitsü indang olen ka ashidang, “Party dangi meyipa arunürtem onoki (NPF) pelashishia agizüktsü” ta metetdaktsü.
Lungkak aitba sentong anena atar saka ozüng alema tentetba state sorkari maneni ketdangsüa ora, party MLA temi Assembly nung private bill ka benoktsü, ta Yitachu-i ashi.
“Nübortemi shimtetba yimsüsürtem ama onoki Naga nunger temeten atema raratsü aser ibaji onok teinyaktsü lir. Nagaland state nung ozüngren lidaktsütsü aser Linük Temzüng sülen anidaktsü atema onoki merangtsü” ta paisa shisem.
Taküm July 19 nungi Governor P B Acharya-i telok toktsür aoba MLA tem len ania ozüng alema mapa inyaksangshia arur. Taruba state general elections nungji NPF-i BJP den tesentaktep kecha meyui dang tokteptsü, ta Yitachu-isa metetdaktsü.
“Tanü tashi Governor-i ola ka danga madoker saka pai NPF dang telok sasep nung mepetmesü angatetteptsü atemabo mepishiogo. Iba jagi pai Nagaland state nung ozüng alema sorkar ka kümdaktsüba kuli sayur” ta paisa ashi.
NPF Working President, Apong Pongener-i lanurtem dang NPF General Convention agitsü aliba atema lungkak aitba sentong anena atatsü mepishia ashidang, “October 17 nü Election Commission of India-i tetuyuba agütsüba ama, general convention ji kanga dang tongtipang lir kechiyong iba ajanga Party indang chichiba kiburtem metettsü. Iba nung youth wing-i meyaritepra takok mangutsü” ta metetdaktsü.
“Party lanurtemi mapang talangtiba lungkak aityonga aruba ajanga, inyakyim kar melenshidar aser party nung dennertem asoshi kishi lapokja dang lir. Politics nung teti atema medemer mesüra tsükchir mali aser onoki iba mepetmesü ya tekaratiba nung koktettsü imlar” ta Apong Pongener-isa shisem.
NPF Central Executive Council Member, Povotso Lohe-ia o jembidang, TR Zeliang den adenba NPF MLA tem dang 10thSchedule nung lateta alibatem mashileni sayur anidakdaktsür, ta ashi.
India Linük Temzüngi Shurhozelie-i aniba NPF nem takok agütsütsü aser ochii ajak koktettsü, ta Lohe-isa shisem.
Iba sentong nung NPF Central Youth Wing president, N Vihoshe-i anküp tepela o jembi.