NPF Central Youth Wing-i maneni lungkak aittsü

Kohima, November 6 (TYO): Dr Shurhozelie Liezietsu-i aniba Central Youth Wing of Naga People’s Front (NPF)-i State Civil Secretariat kima maneni lungkak aittsü ta metetdaktsüogo.
Tanü anogo 11 buba lungkak aitba mapang NPF Central-i lanurtem dang lungkak aitba anentsü atema ashi saka iba asoshi kuli tejangja kecha magütsü, ta NPF Central Youth Wing osang kar ajanga ashi.
October 23 nungi tenzüka anogo pezü- October 28-29 aser November 4-5 dak alaka NPF Central Youth Wing-i lungkak aitba sentong agia arur. Parnoki Assembly Speaker Imtiwapang Aier dang NPF Chief Whip aser NPF Legislature Party Leader agizükba, Chief Minister T R Zeliang-i anir telok toktsür aoba NPF MLAs anema disqualification petition ken o tem atema oshidang agüjang ta takhangba agüja parnoki lungkak aiter.
NPF Central Office-i mepishiba nung ajemdaker Youth Wing pur tanü senden ka amen aser idangji parnoki akhangba ama telangzüba mangu tashi lungkak aittsü ta telemtetba ka agi.
Ajisüaka, iba onük atema parnoki asüng NPF Central Office lennirtem den ajuruteptsü ta osang angazüker.
Tanü lanurtemi lungkak aitdang, NPF nungi züngdokba MLA T R Zeliang lenisüba kübok sorkar tentetba indang kuliji Governor-i agütsütsüla ta takhangba agütsü.
“July 19 nü Governor-i Chief Minister Dr Shurhozelie Liezietsu-i aniba sorkar anentsüba aser ozüng alema TR Zeliang-i aniba sorkar kümdaktsüba ajanga Nagaland state nung tensa mejungi aküm” ta tanü MLA Yitachu-i o jembidang ashi.
India Linük Temzüng nung lateta aliba ozüngji nübortem indang temetentem kümzüka ayutsü atema lir saka Nagaland nungbo Governor-i Linük Temzüng alema mapa inyak aser tang tashi ola madoker, ta paisa ashi.
“State Governor-ibo ochimashi mapa inyakba nungi jenbutsü ta mali kechiyong pai tesüiba ita pezü tsüngda ozüng alema mapa mapa inyakogo” ta Yitachu-isa shisem.
NPF Youth Wing-i November 1 nü India President dangi shidi ka zülu aser ibaji State Chief Secretary Pankaj Kumar ajanga yoktsü atema agütsü saka Chief Secretary-i Governor tsübuba ajanga shidiji tang tashi meyoki lir, ta paisa metetdaktsü.
“State ka nung Chief Secretary ka Governor aser State sorkari azüoka ayur süra, iba state nung aliba nübortemji kechi tia ka nung alitsü?” ta Yiachu-isa asüngdang.
NPF Farmers Wing President, Lanukaba-ia o jembidang ashiba agi, State Assembly Speaker Imtiwapang Aier ji lanur yimsüsür rongnung ka lir saka pai Assembly temzüng kübok manidakba ajanga nübortemi lanurtem dak temulung melemteti kümogo, ta paisa ashi.
Tang telok toktsür aoba NPF MLA temji taoba Congress MLA temi mashileni anir. Taoba Congress MLA temi “Bedrock of Naga society” kaket ajanga Naga nunger maaksütsü aser Naga nunger taginüba ola mangai 1998 State Election nung toktep, ta Lanukaba-isa ashi.
“Parnoki aibelena inyakbatem atema tang tashi tatok memeshii lir aser parnoki maneni Naga nunger temulung yirutsür” ta paisa shisem.
Item ama lennirtem nem state madak ketdangsütsü atema maongka joko magütsütsüla, ta paisa ayongzük.
NPF Secretary Central Office Toniho Sheqi-ia Governor aser Speakerna aitsüba den Zeliang aser Rio nati aniba telokji taaktsü maliba aser tenüng maliba telok ka lir ta ashi.