NPF Central Youth Wing-i Speaker dang akhanger

Dimapur, October 21 (TYO): Nagaland Legislative Speaker, Dr. Imtiwapang Aier tsüngdangdang disqualification onük, NPF Legislature Party leader shimba aser NPF Chief Whip agizükba ken o benoka aliba atema telemtetba ka magira, mapang telatet makai lungkak aittsü ta Naga People’s Front, Central Youth Wing-i metetdaktsü.
October 23, 2017 nungi tenzüka anepdang 10:00 ako nungi nikongdang 4:00 ako tashi Civil Secretariat kima nung lungkak aittsü, ta Media & Press Bureau, NPF, Central Headquarters sangdong ka nung ashi.
Speaker indang office nung benoka aliba onüktemji kanga dang tongtipang aser tang lemtettsüba onüktem lir. Anungji Speaker-i item ken o tem atema mapa kecha meinyakra aser telemtetba magira, ibaji ozüng alema inyakba mapa ka ta züngoktsü, ta Central Youth Wing-i tezüluba agütsüba nung shia lir.
Central Youth Wing-i October 18 nü NLA Speaker nem tezülubaji agütsü.