NPF COB-i Dr. Shürhozelie pusemba nungi masetshir

Dimapur, October 4 (TYO): October 4, 2017 nü Central Office Kohima nung Naga People’s Front (NPF) indang Central Office Bearers (COB) senden amen.
Senden nung COB-i tir Dr. Shürhozelie Liezietsu pusema nungitba nungi masetshitsü lemtet. Maneni, tir-i Central Executive Council (CEC) indang senden jateptsü aser NPF indang General Convention atema anogo den tesem shimtsü atema COB-i mulunga agizük.
NSCN (IM) aser India sorkar tsüngda yimjung maparen inyakba COB-i maneni pusemer aser India sorkari NNPGs indang Working Group jaokba atema pelar, ta Vice President & Convenor, Pusazo Luruo aser Spokesperson & Member Secretary, Achumbemo Kikon nati sangdong ka nung metetdaktsü.
Naga yimten tebilemtsü atema telemtetba agiba nung sendaktepa alirtem ajak adentsüla ta NPF-i bilemer aser nokdaker. Talisa, NSCN (K)-i ozüng alema mapa inyakba anentsü aser Naga nungeri aginüba ama India sorkar den olemtep tenzüktsü atema mepishia metetdaktsür, ta COB-isa metetdaktsü.
Central Executive Council (CEC) senden jateper:
Ano, tanga sangdong ka nung Naga People’s Front President, Dr. Shürhozelie Liezietsu-i taruba Central Executive Council (CEC) senden October 20, 2017 nü amentsü ta metetdaktsü.
Sendenji Central Office, Kohima nung anepdang 10:30 ako nungi tenzüktsü, ta Dr. Shürhozelie-i sangdong nungsa shia lir.