NPF CYW Leadership Meet tembangogo

November 19, 2021 nü State Academy Hall nung NPF MLA tem aser MP temi NPF youth wing ketdangpurtem den külemi agiba noksa angur.

Kohima, November 19, 2021 (TYO): ” Asen tsüraburtemi Naga yimten asoshi azü tokshibaji tanga telemtetba kecha atema masü saka yimten nüchiso asoshi tenla agütsüba liasü, anungji tanüa yimten nüchiso jenjang ka mesüra, tanga telemtetba bener arubajibo khen atema dang asütsü,” ta tanü MLA Wb.Kuzholuzo Nienu-i yangi State Academy Hall nung NPF lanurtem senden sentong ka nung jembidang metetdaktsü.

“Naga nungeri kechiba yimjung mali ta pei sasa bushidangtsüla aser asenok longjem nung dang yimjung angutsü. Naga nunger longjema maliba ajanga yimjung mali aser pei atema dang bilemba aser ‘ism’ tangatetba agientsüla. Naga nunger ajak ajungtsü atema kin telemsa malitsüla” ta pai metetdaktsü.

“Kechisarena atema mapang ka lir aser NPF-i küm 15 tashi anogo tajungtem ajurua sorkar yimsü süogo. Ano opposition nung alidanga party-i shilem tajung agiogo. Opposition nung aliba ya lenisüba tendangba mapang ka lir aser aikatibo magizükteter saka tashi itta alirtemi dang tizükteta tejakleni aoer” ta MLA Kuzholuzo Nienu-isa ashi.

“Lanur tanishirtemi pei dak amangtsüla aser kechi atalokdir ibaji tajung atema dang ataloker ta angatettsüla. Tsüngremi dang asen tarutsü yanglutsür aser ibaji asenoki agizüktsüla” ta paisa ayongzük.

“Naga linük nung mepetmesü agi sünger aru aser 1997 küm Naga yimten teloktem aser India sorkar tsüngda Ceasefire nung sign sütep. Lennirtemi yimjung atema molungtepa linük tasen ka yangertsü jembitepa arur küm 25 süiogo” ta Outer Manipur Parliamentary Constituency nungi Member of Parliament (Lok Sabha) Dr Lorho S Pfoze-ia ashi.

“Tanishirtemi Naga nungeri inyakba mapatem shisadangtsüla aser tamang mesamatsüla. Tsüngremi asenok kija shia aser Naga nunger atema nükjidong ka lir anungji lanurtemi yimjung bener arurtem asütsü ayongzüker” ta Dr Lorho-isa metetdaktsü.

Manipur nung NPF party-i shilem agiba indang olen kar jembidang bandhs ajema kümogo aser Manipur nung tanü yimjung lir, ta ashi.

“An tebongi anepdang züngia akonger aser iba yagi ammang süiba aser anogo tasen ka ajuruba sayur. Anungji NPF-i teimla, tayongzükba, mapa aser mera tasentem bener aruba temelenshirtem asütsü merangtsüla” ta paisa ashi.

“Mepetmesü aser tera agi sünger aliba loktiliba ka nung lanurtemi telemtetba tajung ka bener arutettsü aser asenoki tang nüngdakbaji yimjung lir” ta Nagaland MLA Dr Chumben Murry-ia ashi.

Anogo ana NPF Youth Wing mungdang amongdang Party President, Dr. Shurhozelie Liezietsu aser NPF Legislature Party Leader, T. R. Zeliang lenisüba pusema nungiter ta bangzüngtep.

NPF Youth Wing-isa Indo-Naga yimjung maparen nung yariteptsü atema opposition maliba United Democratic Alliance (UDA) sorkar kümtetba atema tenüngsang agütsü aser pelaba metetdaktsü.

NPF Youth Wing-isa Naga National Political Groups ajak dang obang meputep aliba onüktem angatetteptsü aser tekaratiba nung Indo-Naga Political olemtep tembangtsü atema longjemtsü ayongzükogo.

NPF ya Naga loktiliba nung tera yanga lir aser 2022 Manipur State General Election aser 2023 Nagaland State General Election atema party tashi aittsü aser takok angutsü atema inyaktsü, ta NPF Youth Wing-isa bangzüngtepogo.

Parnokisa NPF office indang kümsük ka nung ‘Youth Wing Leaders Meet’ khenbosa ayonga agitsü telemtetba agi.