NPF Dimapur Division süngdong tema among

Dimapur, April 14 (TYO) : NPF Dimapur Division Tir Nungsang Jamir-i anir Assembly Constituency pongu prong nungi züngsemtem dena tanü Brihostibarnü Chumukedima nung NPF office temeket merük mejua aser süngdong tema monga liasü.
Tir Nungsang Jamir-i, süngdong atemba ya alima ajak nung kanga tongtibang aser nüngdakba mapa ka lir kechiyong süngdong tasen atemba ajanga asenoki lentokba süngdongtem mesemer aser ibaji ajanga lipoküm liromedema kümdaktsür. Süngdong onsara lentokba aser ajema akümba agi ‘global warming’ tali sashia kümdaktsüogo. Joko Nagaland nunga dena küm ishika kanga atsükba ajangshia arudar, ta ashi.
“Asenoki tanü atemba süngdong ajak ya asenok sür-a talangka alitsü aser tarutsü putu nung taküm alirtemi tanü asenoki mapa tila ka amai bilema tema yutsüba süngdong tem ngua asenok tenüng asangtsü. Süngdongtemi akhüm aser mopung temokong agütsüba dang masü saka aliba tesem dena tobur jungdaktsür,” ta Nungsangbai ashi.
Tanü nübutoka amonger ajak dang pei pei kima aser alutem nunga süngdong atemtsü asoshi pai ajungshia liasü.
Kanga ajungdaka sangdong sür nung iba nübutok aser süngdong atema sentong nung nübur aikati NPF Party nungita shilem agiba ngua arua adener ajak dang kanga dang pelar, ta  paisa metetdaktsü.
Nungsang Jamir-i, taküm küm tatemlen NPF Dimapur Division-i Dimapur nung rally ka akatsü sentong lir, anungji iba rally ji takok tulu ngua agitettsü atema tanü iba sentong nung shilem agirtem ajak shisatsü nung renemshir atadaktsüner, ta metetdaktsü.
Press Secretary to Chief Minister Nagaland, Sebastian Zumvu-a iba nübutok sentong nung dena mezüngbuba süngdong pai atem.
Iba sentong nung shilem agir party züngsem nisung 150 shi liasü.