NPF-i Angh agientsü aser TR Zeliang’er sorkar anentsütsü takhangba agütsür

Kohima, August 11 (TYO): Hokolbar nungi Naga People’s Front (NPF)-i Raj Bhavan kima anogo pezünü lungkak aitba sentong tenzükogo.
Nagaland nung India Linük Temzüng nung aliba ama inyaksangshitsü atema Angh P B Acharya anentsütsü aser T R Zeliang-i aniba sorkar agientsü atema takhangba agüja parnoki lungkak aiter.
Iba sentong ya NPF Central Youth Wing-i ketdangsüa ayonger aser August 14, 2017 tashi agitsü. Tanü NPF MLA tem dena lennirtemi shilem agia liasü.
Parnoki “India Linük Temzüng akhi ama kümdakjang”, “Temzüng alema akümba T R Zeliang-i aniba sorkar anenjang”, aser “Tangsatang Nagaland Angh P B Acharya agienang” ta tezülubatem amer lungkak ait.
Angh Acharya-i July 19, 2017 nü Dr Shurhozelie Liezietsu-i aniba sorkar anentsüba sülen NPF Youth Wing-i tang agi tanabenbuba lungkak aitba sentong ayonga agir.
Tanü Raj Bhavan kima nung MLA Yitachu-i osangbener den jembidang, India sorkari India Linük Temzüng mapa küma meinyaknüra, Naga nunger toktsütsüla. Aji asünungdang Naga nungeri pei den apet ozüngtem yanglutsü, ta ashi.
T R Zeliang ji NPF nungi meindokogo aser pai tang Nagaland nung ozüngi memelaba sorkar ka kümteta lir. India Linük Temzüng nung party maliba sorkar ka akümtsü temelaba agüja mali, ta paisa metetdaktsü.
Senso ajakibo India Linük Temzüng junga memetet anungji Angh-i Temzüng amer ka ama sensotem kümzüka ayutsü melena, pai bilemba aser aginüba ama tai inyak, ta Yitachu-isa ashi.
Naga nungertemi India Linük Temzüng metetba, meimba aser kümzüka ayuba Angh ka aginür. Angh Acharya-i Linük Temzüng raksaa endoktsü renema liasü aser iba jagi Naga nungertemi pa maginür. Angh-i pa kechi nungi aru aji agi meyipa aotsüla, ta paisa shisem.
“Kodangsa Nagaland nung khuret ka adokdir, idangji Angh station nung malir. Kechiba pai nübortem ola mangashii jenasa aoer” ta Yitachu-isa asüngdang.
Angh-i ochimashi indang kanga jembir, saka ozüng alema TR Zeliang’er sorkar kümdaktsübaji ochimashi inyakyim tematiba liasü aser Angh kati yamai inyaktsü tabo kecha meimlai liasü,
TR Zeliang aser tanga NPF MLA 19 ji party nungi aridokogo aser parnok party mashi ka nung adentsü akok saka tang parnoki Naga nunger mangmangdaktsütsü atema tai mapatem inyaker, ta Yitachu-isa ashi.
Lok Sabha MP, Neiphiu Rio-i Democratic People’s Party (DPP) tentetba nung shilem agiba aser pai Sovima nung par kidang nungi NPF office ama mapa inyakbaji nisung ajaki meteta lir.
Rio-i par alu nung metsü prok saka aji mainba agi pai tangar lu nungi tsük arutsü meranger. MP ka ama pai Naga nunger atema jembitsüla aser ozüng alema mapa inyakogo ta ashitsüla , saka iba inyakyim nung pa dena liasü aser tatem nung pa interim president akümbaji maaksü ka lir, ta Yitachu-isa metetdaktsü.
Asen state nung ozüng alema mapa inyaka aruyonga Naga civil society shingaia ola madok aser iba ajanga asen loktiliba ya shiametetba loktiliba ka masü ta sayur, ta paisa shisem.
Mapa ka nungdanga nisung ka ozüng alema shimra, State nung RTI activist temi ola adoker aser iba ken o okadak benoker saka tanübo ozüng alema inyakba atema parnoki ola madoker aser iba ya Naga nunger ajak atema maaksü lir, ta Yitachu-isa ashi.
MLA, R Tohanba-ia ashiba agi, Angh aser Speaker nati India Linük Temzüng alema inyaksangshibaji Naga nungertemi magizüktsü.
NPF-i teti Naga nunger temeten kümzüka ayutsü aser NPF temzüng nung Interim President mapa mali aser Tir ka dang lir aser ibaji Dr. Shürhozelie-i bena lir, ta Tohanba-isa shisem.
Acharya-i Nagaland nung India Linük Temzüng raksatsü, anungji pa Nagaland nung Angh inyaktsü metemsü, ta NPF Central Working President, Huska Yepthomi-ia ashi.
“Centre-i pa meyipa anir maoyonga, Acharya-i pa sasa khu renemer, pa kong nungi aru, aji agi meyipa aotsüla” ta Huska-isa shisem.