NPF-i aniba DAN nung JD(U) madener

Kohima, Tsüklai 3 (TYO): BJP-i Naga People’s Front (NPF)-i aniba Democratic Alliance of Nagaland (DAN) nungi lokzüka aoba sülen anogo ka lir Janata Dal (United)-ia DAN teloktep nung madentsü telemtetba agiogo.
Iba osang ya tanü JD(U) Nagaland President Senchumo (NSN) Lotha aser Election Campaign Committee chairman Y M Humtsoe nati sangdong ka nung metetdaktsü.
2003 nungi JD(U) ya DAN nung dena aru aser tang joko NPF o NCP na dang DAN teloktep nung anünga lir.
“Tesüiba küm pungu tashi NPF aser BJP nati aniba DAN sorkari junga ketdang mesütet. Parnok sasep nung mangatettep adoka lenisütsü atema tashi raktepa aru. Iba ajanga tenangzükba agiba sentongtem tanen makai agitsüsa aküm aser nübortemi menütsü” ta JD(U) sangdong nung shia lir.
Public atema mebilemtsüi lennirtemi tashi raktepba manen aser nübortemi MLA menden nung mendaktsüba hao ta mali mezüngmeshi, ta parnokisa ashi.
Sorkar inyakyim ajak nung ochimashi agi sünga lir aser terenlok mapa inyaktsü atema agütsüba senotsü Chief Minister menden yaritsü atema tim mesüi amshi. JD(U) nungi MLA ka dang maliasü aser iba jagi DAN nung tenüng atema teyariteper ka ama dang liasü, ta JD(U) sangdong nungsa metetdaktsü.
“JD (U) Nagaland-i tajung tamajung ajak jungjunga asadangba sülen DAN nung madentsü telemtetba agir aser party kecha dena election magidang tesentaktep mayutsü” ta parnokisa ashi.
13 buba Nagaland Legislative Assembly election nung JD (U)-i tokteptsü aser party kecha dena tesentaktep meliaka menden aika nung takok angutsü. JD(U) MLA temi sorkar timi ketdangsüba sayutsü, ta Senchumo (NSN) Lotha aser Y M Humtsoe nati metetdaktsü.