NPF-i aniba DAN sorkar dang nübur mepelar: K Therie

Dimapur, December 18 (TYO): NPF-i aniba DAN sorkari BJP jenokdakja tamangba yimsü aser Naga nunger maitsü amokmeren tia ajurudaktsüba ajanga Naga nungeri parnok dang mepelar, ta tanü Nagaland Pradesh Congress Committee (NPCC) Tir, K Therie-i metetdaktsü.
District Congress Committee Khristmas jeli sentong nung party nung inyakertem den jembidang Therie-i, “Parnok nem Khristantem aser tangartem anema benshidaktsütsüji onoki memelatsü, kechiyong Khristan ka ama onoki tesünep aser tepela nung amanger,” ta ashi.
Therie-i, “Asenok tamangba yimsü atema nokdaktsü asoshi party ji Congress party ya dang lir aser tekaraba nung party-i inyaktsü, kechiong onoki secularism, socialism aser democracy tangatetbatem nung nokdaker,” ta ashi.
“BJP-i terenok atema Nagaland nung teloktep sorkar atema jembir, ajisüaka gari lenmang aser aputem yanglutsü atema senotsü mali, aser tanga infrastructures chirepogo,” ta paisa ashi.
Election Commission of India (ECI)-i general election sangdonga aliba ama agitsü ta sangdongogo, ta shia Therie-i, ECI-i Khristmas matongdang election anogo sangdongtsüa akok, aser January 15, 2018 nü tashi nungbo maparen renemtsü, ta metetdaktsü.
Taruba election nung Congress-i candidate tasentem shima toktepdaksütsü, ta paisa metetdaktsü.
Kasa sentong nung Naga Council Dimapur, Dimapur Sadar GB Union aser Dimapur Urban Colony Chairman Federation nungi ketdangpurtemia jembia liasü aser Thahekhu Village Baptist Church Pastor, Tovishe Achumi-i Khristmas osangtajung bena liasü.