NPF-i anogo anabuba Speaker anema lungkak ait

Kohima, October 24 (TYO): Naga People’s Front (NPF) Central Youth Wing-i NLA Speaker, Imtiwapang Aier anema Nagaland Civil Secretariat nung anogo ananübuba lungkak aitogo.
Telok tuluba ta ser sorkar kümteta inyaktsü makok aser telok tuluba kati telok tila ka dak tim masüba mapa inyaktsü makok, ta tanü MLA C. L John-i NPF party züngsemtem den jembidang ashi.
Telok tuluba ta ser India Linük Temzüng nung aliba telatetbatem magientettsü. Speaker-i telok tuluba nung ajemdaker senso nem agüja aliba temedentem alema meinyaktettsü. NPF central Youth wing-i temepishiba ken o tem benoka aliba atema pai tetuyuba ka agütsütsüla, ta paisa ashi.
Taoba Speaker aser MLA, Dr. Chotisuh Sazo-ia ashiba agi, speaker ka indang mendenji kanga dang akhümket menden ka lir aser pai referee ka ama inyaksangshitsüla.
Sorkari deputy speaker ka meshimba atema Dr. Chotisuh-i aitsü aser parliamentary secretary 26 ji ozüng alema shim ta paisa shisem.
Nagaland governor aser speaker nati India Linük Temzüng alema mapa inyakogo. Speaker-i inyakyim ana nungi ka dang shimtsü anünga lir- kaji par kinungersang indang tim masüba ozüng aser kaji Indian Law lir, ta Dr. Chotisuh-isa metetdaktsü.
NPF Chief Whip aser NPF Legislators’ Spokesperson, Yitachu-ia ashiba agi, “NLA speaker-i tetuyuba kar agütsütsü melena kuli ang agütsü. Speaker-i shir tsütsü südir süang, ozüng nung aliba ama tetuyuba agütsütsüla.”
Pai asür Kiyanilie Peseyie melenzükba indang disqualification petition ka benokba atema ashidang, “Speaker-i petitioner asüba ajanga iba ken o ji magitsü ta angateter süra, kechiba Speaker-i tetuyuba ka magütsür. Aji asü nungbo lungkak aitba ya melila” ta Yitachu-isa shisem.
Rio-i iba lungkak aitba ya ozüngi memelar ta ashiba atema Yitachu-isa “ULB onük atema kiojen aser office tem rongdoktsüba ama mesüi, NPF züngsemtemi timi dang ozüng alema mapa inyakbatem metetdaktsürba lir” ta ashi.
NPF Central Youth Wing-i asüngnep 10:00 ako nungi maneni lungkak aitba sentong agitsü ta metetdaktsü.