NPF-i anogo ananübuba Angh Acharya anema lungkak ait

Kohima, August 12 (TYO):Angh P B Acharya-i Nagaland nung Linük Temzüng alema mapa inyakba atema mapa nungi anenjang ta takhangba agüja Naga People’s Front (NPF)-i tanü agi anogo anabuba lungkak aitba sentong agiogo.
“Angh-i temzüng alema T R Zeliang’er sorkar kümdaktsü, anungji India sorkari Acharya meyipa anir aotsüla” ta tanü NPF Legislature Party lennir, Kuzholuzo Azo Nienu-i ashi.
Raj Bhavan kima nung NPF Central Youth Wing-i lungkak aitba sentong nung jembidang Azo-i iba osang metetdaktsü.
2015 küm NPF MLA 22-i Kaito leader tasen aser NPF Party whip shimer TR Zeliang’er sorkar atsüngdoktsü merangba den kasa tanga atalokogo, ta paisa ashi.
Taoba mapang Angh Acharya-i NPF MLA 22-i sorkar akümtsü kuli agütsüba magizük. Idangji pai iba onükji party sasep indang lir aser NPF MLA temi Party temzüng kübok angatetteptsüla ta ashi, ta Azo-isa shisem.
“Ajisüaka, tangbo Acharya-i temzüng mesüra inyakyim sülen manidaki, July 19 nü Dr Shurhozelie Liezietsu’er sorkar anentsü aser India Linük Temzüng alema TR Zeliang’er sorkar kümdaktsü” ta paisa ashi.
Angh Acharya-i raksaja aliba Linük Temzüng Centre-i Nagaland state nung shia arudaktsütsü atema NPF Central den MLA temi iba lungkak aitba sentong timi agir, ta Azo-isa metetdaktsü.
India sorkari Linük Temzüng kübok state aser sensotemi kümzüka meyutetra, Naga nunger pei sasa yimsü süa alitsü atema tashi agütsütsüla, ta paisa shisem.
Tanü MLA C L John-ia party züngsemtem ayongzüka jembidang, Dr Shurhozelie lenisüba kübok NPF Party minority kümogo saka asenoki iba nung temulung ila mebilemtsüla saka Party temzüng nung akangkanga nokdaktsüla, ta ashi.
TR Zeliang kübok NPF MLA temi Nagaland nung NPF Party ketdang asür ama kuli agutsür saka ibaji Photostat copies ama lir, kechiyong MLA 36 dak alaka tanüngba NPF lennirtem ajak NPF tir Dr Shurhozelie Liezietsu pusema nungiter, ta CL John-isa ashi.
Dr Shurhozelie anema nokdakba MLA temji maongka bushirtem, tashi aser sen aginürtem lir aser parnoki public atema kecha mebilemtsür. Angh tang station nung maliba ya Linük Temzüng angazüktsü atema tangalen aoba asütsü akok, kechiyong pai sen ajangzüktsü atema Linük Temzüng nung aliba ama meinyaktet, ta paisa metetdaktsü.
MLA P Longon-ia ashiba agi, Nagaland nung ochimashitiba Anghji Acharya lir.
“Taoba mapang Angh shingaia linük nung state kecha nunga yamai linük temzüng alema meinyakdang. Anungji Acharya-i Angh inyaktsü metemsü” ta Longon-isa shisem.
PB Acharya ama Angh ya Naga nungertemi maginür, anungji August 15 sülena Centre-i Acharya anir mao tashi NPF-i lungkak aitba sentongtem agitsü, ta paisa shisem.
Asüng Deobar anogo süaka, Raj Bhavan kima nung devotional service ka agia lungkak aitba sentong maneni agitsü, ta tanü NPF Central Youth Wing Vice President Achamo Kikon-i metetdaktsü.