NPF-i BJP den tesendaktep yanglushitsü; Zeliang CM candidate asütsü

Kohima, Aenjeti (January) 23 (TYO): Naga tribal tentettemi election masü saka Naga yimtenren onük latettsü atema akhangba mapang ka nung tanü ruling party, Naga People’s Front (NPF)-i BJP den tesendaktep raksaa aliba yanglushitsü aser maneni T R Zeliang Chief Minister candidate ser election nung tokteptsü lemtetogo.
Tanü Kohima nung aliba Central Headquarters nung NPF Central Executive Council (CEC) rongdak senden ka nung itemji lemteta liasü.
Yaküm July 18 nü NPF-i BJP den tesendaktep pilatsü lemteta liasü, aser Aenjeti (jan) 15 nü Central Office Bearers-i ibaji CEC nung benok; BJP ya 2003 küm nungi NPF den loktepa lir.
Tanü senden nung bangzüng trok renemogo, aser iba senden nung Chief Minister, T R Zeliang aser Party Tir, Dr Shurhozelie Liezietsu-i, “NPF-i BJP den tesendaktep pilatsü atema lemtetba onük nung nübur telok balalai iba telemtetba reprangshitsü mepishiba ama CEC-i iba onük nung talangka o lemtepa iba kuli bushi, aser iba telemtetbaji party sasep nung mangatettep alidang sensotem indang temzüng nung aliba temetentem kümzüka ayutsü atema lemtet, ta bushitet,” ta metetdaktsü.
Ajisüaka yaküm December ita nung party longjemshiba sülen India sorkar aser yimtenren telok trok densema NSCN (IM) tsüngda ken o jembiba nung tensa tajung ka bener arutsütsü tangatetba nung CEC-i iba onük reprangshitsü nüngdak ta bilema tamalen ama BJP den mepilatsü lemtet.
NPF CEC-isa NSCN (K) dang nübur ola angaa India sorkar den maneni ceasefire yanglushitsü aser yimtenren ken o jembiba nung adentsü mepishi.
Taruba election atema menden lemsaba dak sendakba nung BJP-i benokba ama NPF-i melungogo, ajisüaka itemji junga shisadanger ang inyaktsü lemtet.
NPF CEC-isa yaküm Luchii (Dec) ita 15 nü Assembly nung, election magidang Naga yimtenren ken o latettsü atema bangzünga renemba maneni pusemtsü lemtet.
NPF CEC-isa Dr Shurhozelie maneni NPF Tir asütsü aser NPF Parliamentary Party nung lemtetba ama T. R Zeliang CM candidate ser election nung tokteptsü lemtet.
NPC CEC-isa constituency kar nung party ticket alemba dak sendakba nung Working Committee-i telemtetba magitetra iba telemtetba agitsü atema NPF Tir aser Chief Minister na nem tashi agutsü.
Naga nungeri tamang kaa tesüiba küm 15 tashi yimsüsütsü atema NPF nem maongka agütsüba atema nüburtem dang pelaba lemsatepa NPC CEC-i maneni sensotem dang tarutsü nunga NPF yaritsü mepishia metetdaktsüogo.