NPF-i BJP onük jangjashitsür

Dimapur, Aenjeti (January) 17 (TYO): NPF-i BJP den tesentaktep pilar ta Aenjeti 16, 2018 nü osangkaket kar nung adokbaji tiyazü ta Media & Press Bureau, Naga People’s Front-i sangdong ka nung metetdaktsü.
Iba osang ya Aenjeti 15 nü Central Office Bearers (COB) senden amendang jembiba onüktem nungi agiteta sangdongba lir. Ajisüaka, iba senden nung BJP den tesentaktep pilatsü indang telemtetba kecha magi, ta parnokisa ashi.
Senden nung adenertemi kari Chiteni (July) 18, 2017 nü BJP den tesentaktep malitsü ta lemtetba meyipa agitsü asü masü ta tebilemba benoka lemsatep. Idangji iba telemtetba meyipa agitsü COB dak tashi mali anungji CEC dangi abentsü ta telemtetba agi, ta NPF sangdong nungsa shia lir.
Maneni, iba senden nung COB-i ticket alemtsü indang onük mejembi kechiyong ticket alemtsüba indang mapa nung COB dak tashi kecha mali.
Tanü Naga nungertemi election masü saka Naga yimten latettsü atema takhangba agütsür, anungji election agitsü asü magitsü’ar NPF-i kecha meshitet. Tetenzük nungi NPF-i Naga yimten latettsü atema jembia arur aser tang-a kasa tangatetba nung noktaka lir. Anungji, party-i ola madoki dang kechi tensa ka ajurudir ta repranga atar. Ajisüaka, 1998 küm atalokba amabo matalokdaktsünür ta COB senden nung onükbo benoka jembiogo, ta NPF Media Cell-isa metetdaktsü.