NPF-i CAB atema shisalemsatepba senden nung madentsü ; Manipur nung BJP den tesentaktep reprangshitsü

Kohima, January 30 (TYO): Nagaland sorkari asüng Dimapur nung ashishitep aketba Citizenship Amendment Bill 2016 atema shisalemsatepba senden ayongba nung Nagaland nung Opposition Naga People’s Front (NPF) madentsü telemtetba agiogo.
Tanü nikongtsütsü Central Headquarters nung osangbener senden ka ayonga amendang NPF otongdar Achumbemo Kikon-i ashiba agi, “NPF indang Core Committee senden ka President Dr Shürhozelie Liezietsu’er residential office nung amendang iba telemtetba agi.”
Media osangtem ajanga angashiba dak alaka NPF dangi senden nung adentsü jaokba indang official letter kecha maru aser NDPP-i aniba PDA sorkari Lok Sabha nun iba bill benokdang anema menokdak ta Core Committee senden nung jembi, ta Kikon-isa ashi. Lok Sabha nung MP ji NDPP candidate Tokheho Sema lir saka pai Bill anema menokdak. Anungji, NDPP-i aniba PDA sorkari iba tebilemtsü atema senden ayongtsü temeten mali ta NPF-i ajiteter, ta paisa shisem.
PDA sorkari state cabinet senden balala amendang Nagaland ya Arrla 371(A) aser Inner Line Permit (ILP) ajanga kümzüka lir ta shia Naga nunger ashiokja aru. Naga kin hohotem aser civil society temi ashiba mangai parnoki iba telemtetba agi saka January 28 nü parnoki kanga dang ajungbena tangatetba melenshia CAB magizüker ta lemtet aser shisalemsatepba senden ka amentsü ayong, ta NPF otongdarisa metetdaktsü.
“NPF ya northeast nung political party tejentiba lir anungji NDPP mesüra PDA sorkar dang nungi Naga nunger aser North East nunger taginüba posemtsü indang kulikaket angutsü nüngdak madoker. NDPP-i aniba PDA sorkari senden ayongba ya parnok tejak meitsüba mapa ka dang lir aser political party tem den civil society tem dak tai tongloktsütsü atema lir” ta paisa shisem.
Kikon-isa ashiba agi, Lok Sabha nung CAB 2016 agizükba ajanga NPF Core Committee-i Manipur nung BJP den tesentaktep aliba reprangshitsü lemtet.
CAB agizüka ozüng kümdaktsütsüba mapa ya BJP-i aniba Centre sorkar taginüba lir, kechiyong parnok North East nung ali tazüngtem nguogo. Ajisüaka, North East ya ozüng alema arurtem jenokdak tesem ka ama mamshidaktsütsü aser onoki maneni CAB anema noktaktsü, ta Kikon-isa metetdaktsü.
Nagaland nungi Rajya Sabha MP, K G Kenye-i Parliament nung bill anema noktaktsü, ta paisa shisem.
Yashi Guwahati nung North East Region Political Parties senden nung NPF adenbaji BJP den yaritepba teloktem den adenba masü saka CAB 2016 anema külem political party tem den noktakba liasü, ta paisa ashi.
Yashi senden tembangtsü atema minute pungu shi lia NDPP president Chingwang Konyak aser ketdangser kar aru aser iba ajanga NDPP-i CAB 2016 atema bilemba sayur, ta Kikon-isa shisem.