NPF-i CM nem oleplang agutsür

Kohima, Chiteni/July 05 (TYO): Chief Minister, Neiphiu Rio-i Naga nunger aliba tesemtem longjemtsü atema akhangbaji tim, ta nangzükbaji Naga Peoples’ Front-i pelaa agizüker, ajisüaka Naga nunger tarutsü tia den atsü-anem kaa pai integration ji joko tamakoktsü ta jembiba atema NPF-i tasüngdangba akar, ta tanü Press Bureau,Naga People’s Front, Central Headquarter, Kohima, Nagaland sangdong ajanga metetdaktsü.
Chiteni/July 4, 2018 nü Chief Minister-i sangdong ka ajanga, Aami/June 14, 2018 nü New Delhi nung interview ka nung pai jembiba oji media-i tai ratet ta tai tonglokja, item oji pa nija mesüra NDPP aser PDA sorkari tebilemba o masü, ta jembibaji nübur nük nungi jenbutsü tatemtsü ka liasü, ta sangdong nung shia lir.
“Naga nungeri, Rio leniba kübok tang aliba PDA sorkari Naga nunger ka küma longjemer alitsü mangdang atema inyaktsü ta imlaa liasü, ajisüaka pai osangbenertem dang integration ji joko tamakoktsü ta jembiba ajanga Naga nunger aoksadaktsüogo. Rio-i, media-i tai ratet ta jembiba ajanga pa mejenbur, kechiyong video noksa aser tanga documentary kuliji nübur ajaki angur; Naga nunger shisashirtem saaka lir aser joko mashiokdaktsütettsü,” ta sangdong nung shia lir.
“Iba dak alia Naga public-i Chief Minister dang, koba ama tensa ka ajanga PDA sorkari Naga nunger mangdang nung Centre sorkar den atsüanem akar ta asüngdangtsü temeden lir. Rio aser par party-i integration aser Naga yimtenren tebilemtsü onük atema parnoki inyaker ta jembibaji tashioktsüba ka kümogo, aser par sorkari Naga yimtenren onük ajaki akhümketa tekaraba nung agizüktettsüsa nungita inyaktsü ta jembibaji, otsü tajung keta maliba kaket ka mesük,” ta NPF-isa ashi.
NPF-i pezüben tashi Chief Minister, Neiphiu Rio-i mangatettep aliba Citizenship Amendment Bill 2016 nung tejangja mejembiba atema mepelar. Kechiba par sorkari linük nung rongrong adokdaktsüba Bill ji anema menokdaktsü ta jembiar Naga nungeri metetner, ta sangdong nung shia lir.
NPF-isa, Rio aser pa den külemi inyakertemi Nagaland ya ozüng alema bendangertem arua alitsü atema tesem ka kümogo ta meteta lir; Citizenship Amendment Bill ya tanga kecha masü saka vote banks atema ozüng alema bendangertem ano taliba state-i arua alitsü atema lir, ta metetdaktsü.
NPF-i PDA sorkar dang, “Onoki iba tongtibang onük ana ya opposition party ka ama nüburtem dang sayutsü atema ola adoker masü, saka Naga nunger kümzüka alitsü atema inyaker ta PDA sorkar dang nenshia metetdaktsür,” ta ashi.
“Naga nunger akoksatsü atema inyakba nungbo party-i ola madoki repranga dangbo metoktsütsü, mesüra Naga nunger tarutsü tia den sayatsü atema PDA lennirtem aser Chief Minister nem temelaba magutsütsü,” ta NPF-isa metetdaktsü.