NPF-i CMO o meyiptsür; Citizenship Amendment Bill 2016 magizüker

Dimapur, Aami (June) 15 (TYO): Chief Minister Neiphiu Rio-i Aami (June) 12, 2018 nü Delhi nung o mejembi ta Chief Minister Office (CMO)-i ashibaji temenünütsüka lir ta Naga People’s Front-i tanü metetdaktsü.
Rio-i Naga yimten tarutsü yoka achiba indang onoki Aami (June) 14, 2018 nü sangdong magütsüdang yongi pai iba onük mejembi ta ashitsü ta onoki meteta dang liasü, ta NPF Legislature Party otongdar Imkong Imchen-i ashi.
Iba ya Pilat-i Yisu Khrista kangki nung metatsü atema obendang agütsüba ama lir. Yihuda nungertemi taochi melii Yisu metatsüsa ta metetsümonga Pilat-i yimjak nung pa teka metsükdoka Yihuda nunger ket nung iba ken o agütsü. Neiphiu Rio-ia yimjak nung India sorkar tsütsü dener Naga nunger tarutsü yoka achi aser Naga nunger longjemtsübaji tamakoktsü ta ashi, ta paisa ashi.
Nagaland nung Chief Minister teinyakdak kati iba amai otiotia jembiba aser ibajia linük yimtiba New Delhi nung electronic aser Print Media nisungtem lia jembiba atema NPF-i ashishiteper.
Naga nunger yimten tebilemtsü ashioktsüba atema onoki ashishiteper. Talisa, CMO aser Rio-i Citizenship (Amendment) Bill 2016 indang jembiba magizükba mesüra tiyazü ta kecha mashi. India Linük Temzüng nung Arrla 371(A) ajanga Naga nunger kümzüka ayur anungji par mesüra pai aniba sorkari iba bill anema noktaktsü nüngdak madoker ta Rio-i jembi, ta NPF otongdarisa ashi.
“Bed rock of Naga Society” kaket nung ajemdaker 2002 küm Rio-i Cabinet nungi anen. Idangji pai iba kaket ajanga Naga nunger temeten yoka achir ta jembia liasü saka kasa nisung jagi tanübo Delhi nug par kiburtem peladaktsütsü atema Bill pusema nungiter,
Bengal Frontier Regulation Act 1873 (Inner Line Permit (ILP) ya Dimapur dena Nagaland ajungalen mapa küma inyaktsüla ta NPF-ibo bilemer. Dimapur – I Assembly Constitution A/C I dak alaka Nagaland nung tanüngba Assembly Constituency 59 Naga nunger atema dang wazüka ayutsüba atemabo NPF-i mashishiteper saka Dimapur nunga ILP mapa küma tenzüktsüla, ta Nagaland nung Citizenship Amendment Bill 2016 agizüktsü mesüra pusema nungitttsü nüngdak madoker. Nagaland nung BJP-i aniba PDA sorkari iba Bill agizükra mesüra pusema nungitra onoki sorkar anema akangakanga noktaktsü, ta