NPF-i Congress nungitba atema pelar: K Therie

Dimapur, March 31 (TYO): NPF-i INC candidate K L Chishi yaritsü ta lemtetba ajanga secular tashi itshiba dang masü saka CAB agientsü takhangba aser yimjung maparen tatembang kati arutsü tebilemba tashi itshir, ta K. Therie-i ashi.
Iba telemtetba ya kangasa ulura aser yimtenren talenbangbatem alema lir. NPF-i secular tashitem posema nungitba ya odangbo masütsü. Tanü raraji Hindutva aser Secularism tashitem tsüngda lir, ta paisa ashi.
Asen tamangba yimsü aser maitsü kümzüka ayutsü aser Naga yimten tekaratiba nung latettsü atema onok külemi noktaker, ta K Therie-isa shisem.
“NPF aser kasa tangatetba aliba political party aser shisashirtemi 26-Aonglenden Assembly Constituency bye election nung külemi yariteptsü mepishir. Onoki takok ngura secular NPF force yaritsü. INC MLA shimra paji State Assembly nung metsü ama asütsü” ta paisa metetdaktsü.
Centre sorkar ketdangsütsü atema tashi ngura INC-i state nunga secular tangatetba nung sorkar ka akümba nung posema nungittsü, ta K Therie-isa ashi.