NPF-i COVID Cess aitsür; Aluyimertem atema teyari meshitsür

Dimapur, June 3 (TYO): June 3, 2020 nü T.R Zeliang’er kidang NPF MLA tem aser party ketdangpurtem senden ka amendang telemtetba kar agiogo.
Kohima nung amongertem Tuensang-i yoktsü atema state sorkari telemtetba agiba ajanga timtem tulu bentsür aruogo aser iba telemtetba khukhua aitsür. Iba denji, Cabinet-i COVID-19 putetertem pei pei District-i yoktsü lemtetbaji meyipa agitsüla, ta NPF-i metetdaktsü.
Linük ajunga shibangba ajanga aluyimertemi mapang shitak nung alu mapa meinyaktet anungji state sorkari parnok nem metsüjang agütsütsüla. Ano, shishilembaba mapa tila inyakertem yaritsüla, ta NPF-isa ashi.
COVID-19 wara anema rara nung NPF Party-i maneni nübortem kümzüka ayutsü atema inyaktsü nangzüker, ta parnokisa shisem.
Nagaland nung political party tem dena NGO aikati Petrol aser Diesel nung COVID Cess agiba magizük saka Chief Minister-i iba Cess agitsü telemtetba agi. Iba ajanga kechisarena ajak nung jenjang tuogo aser nübortem timtemdaktsür, ta NPF-isa metetdaktsü.
Nagaland nung COVID-19 anema rara nung Health workers, Village Councils, arogotem, aser loktitentet balalai mapa inyakba atema tenüngsang agütsür, ta NPF-isa ashi.