NPF-i devotional service ka agia Angh anema lungkak ait

Kohima, August 13 (TYO): Naga People’s Front (NPF)-i tanü agi anogo asemnübuba Angh P B Acharya agientsü atema takhangba agüja lungkak aitdagi.
Tesüiba anogo ana NPF Central Youth wing züngsemtem den MLA aser party lennirtemi Raj Bhavan kima anepdang 10:00 ako nungi nikongdang 4:00 ako tashi lungkak aitba sentong agi, saka tanü Deobar asüba agi parnoki anepdang 11:00 ako nungi nikongdang 2:00 ako tashi devotional service ka agia lungkak aitba sentongji agi.
Iba mapang Dr Shurhozelie den NPF MLA tem- Thongwang Konyak, Yitachu aser C L John nungertemi Angh aser Chief Minister TR Zeliang’er sorkar anema o tamajung mejembitsü ayongzük.
Yimten mapa nung Tsüngrem mali ta nisung aikati jembir saka ibaji tai lir, kechiyong Tsüngremji ajak nung dena lir aser Pa medenra, takoktsü kecha mali, ta Yitachu-i ashi.
“Sen aser tashi ajanga tang parnoki mapang tatsüka atema sorkar ketdangsüa otettsü akoki, saka maneni NPF party indang antebong maitsüji sorkar tashi angutsü kechiyong iba ya Naga maitsü indang tongtiret lir” ta MLA John-ia ashi.
MLA asem den NPF Central general secretary Akho Leyri nungertemi party züngsemtem dang tezümatangtsü saka aremzüka aser party nungi masetshii sarasadema atatsü ayongzük.
Angh-i India Linük Temzüng nung keta alibatem angatettsü atema shisatsü aser tangatetba agüjang ta tanü sentong nung lokti sarasadem mapang ka agi.
Parnokisa TR Zeliang-i anir MLA 36-i putepshitsü atema tangatetba agüjang aser Tir Dr Shurhozelie Liezietsu-i aniba NPF Party-i meyipa arutsü atema jembiang ta sarasadem.
Sentong nung sarasadem aser o jembibatem dak alia orphanage tem nem teyari agütsütsü atema tenla saru.
Sentong nung NPF Central vice president, Tsumongo Lotha-i temoatsü meshia sarasadem aser NPF Central Women Wing vice president Khrienuo o NPF Band temi ken ajanga shilem agi.
Raj Bhavan osang ka ajanga ashiba agi, Angh Acharya anogo ishika station nung maliasü aser pa yashi nikongdang Kohima tonga aru.
NPF Central Youth Wing-i ayongzükba lungkak aitba sentong ya asüng tembangtsü.