NPF-i Dr.Shürhozelie CM shimba asoshi pelar

Kohima, Feb. 23 (TYO) : NPF tir aser DAN Co-Ordination Committee nung mendenbuba Dr.Shürhozelie DAN Legislature Party nung lenir aser Nagaland chief minister asütsü shimtetba asoshi DAN nung adener tatartem ajak dang kanga pelar ta tanü NPF Central sangdong ka ajanga metetdaktsüogo.
Yimsüsürtem rongnung ajak ajangshia metetba takotet yimsüsür, Dr.Shürhozelei leniba kübok nübortem ajaki temulung lemteta anidaktsü aser nübortem rongnung tangatettep lia terenlok mapatem takok ngua aotsü imlar ta parnokisa metetdaktsü.
Tanü mezüng cabinet minister-tem aser department shia tekolak purtem den senden alidang, tang nungi inyakertem ajak mapang shitak amshia office nung adentsü aser nübortem tajungtiba agi tenzüktsü jembiba ajak nungji government mapa inyakertem ajaki tashi angaa anidaktsü imlar ta NPF-isa ashi.
Tanep chief minister tasenbai anir minister-tem ajak 9:30 nungbo parnok mapa inyakdak Civil Secretariat atong aser sarasadem mapang agir senden tenzük.
Ano, Brehostibar nüsa Chief Minister aser pa den Cabinet minister-tem dena oagi tawa nübortem longkak aita mokdangba mapang Dimapur nung police-temi khasetba lanur ana aremdak leper semdanga yangji sarasadem mapang agi narolang toktsüba temeim mapa tajung ngua kanga pelar aser iba ama mapaji ajaki pelaa agizüktsü imlar ta NPF purtemisa metetdaktsü.
Ano, taoba chief minister, T.R.Zeliang-ia Naga nunger loktiliba sünepa alitsü asoshi pai pasasa mulungtetter chief minister menden toktsüba asoshi kanga pelar. Iba jagi pai nübortem meimba kuli sayur, ibaji kodanga mamatsü ta NPF Central sangdong ajangasa metetdaktsüogo.