NPF-i Good Governance Day atema Centre dang mepir

Kohima, Nov. 29 (TYO) : Naga People’s Front (NPF)-i Centre sorkar dang December 25 nü “Good Governance Day” mamungtsü atema mepishia metetdaktsü.
Mongulbarnü Party Headquarter, Kohima nung NPF Central Executive Council senden nung iba telemtetba ya agia liasü. Iba senden nung Manipur aser Arunachal Pradesh nungi NPF lennirtem aden.
November 22 nungi 24 tashi Nagaland Legislative Assembly (NLA) winter session alidang, September 22, 2012 nü urban local bodies nung tetsür nem shilem 33 lemzüktsüba dak sendakba telemtetba agia aliba meyipa agiba nung NPF CEC-ia sorkar pusema nungiter ta tanü senden nung bangzünga renem.
Chief Minister, T.R Zeliang-i Myanmar nung NSCN(K) lennirtem dang ceasefire tanaben alitsü aser yimten telemtetba ka agitsü atema India aser Myanmar sorkartem den yimjung olemtep tenzüktsü atema mepishiba nung NPF CEC-ia pusema nungittsü lemtet.
NPF CEC-isa NSCN(IM) aser Centre tsüngda tang tejembidak yimjung maparen nungittsü aser iba olemtep nung Naga nunger ajak ka akümtsü nung masetshii nungittsü lemtet.
NPF CEC-isa state sorkar dang Nagaland nung aliba shirurutem aser süngdonglidongtem kümzüka ayutsü atema mapa inyaktsü ayongzük.