NPF-i KG Kenye nem Rajya Sabha ticket agütsü

Kohima, March 4 (TYO) : Naga People’s Front (NPF)-i Hokolbarnü Rajya Sabha election atema parnok tongti tezülur K G Kenye nem party ticket agütsüba sentong agi.
Taoba Rajya Sabha MP Khekiho Zhimomi yaküm ajungbena iba akümli toktsür aoba ajanga Nagaland State nungi iba menden tazüng liasü.
State Assembly nung züngsem 60-i Rajya Sabha züngsem shimtsü aser tang Assembly nung opposition mali. Züngsem 60 rongnung NPF nungi 48, BJP nungi 4 aser Independent MLA 8 lir. Election Commission-i March 21 nü Rajya Sabha election agitsü atema anogo shimogo saka NPF-i aniba DAN candidate K G Kenye den tetokteper melii pai takok angutsü ama ajiteter.
Hokolbar anüngdang Central Office Headquarter nung NPF tir, Dr Shürhozelie Liezietsu-i Kenye nem ticket agütsü.
Rajya Sabha election atema nisung 11-i Party ticket aginüa tenüng agütsü saka tenüng agütsürtem ka danga mezütoki Central Working Committee (CWC) dang aben, ta tanü sentong nung Dr. Liezietsu-i metetdaktsü.
Ticket aginürtem ajakji party atema tongshi tajung ka ka lir aser parnok ajaki party aser Naga nunger tenzüktsü atema mulunga aliba metetdaktsü. Parnok rongnungi NPF CWC-i K G Kenye official candidate asütsü shimba atema kanga pelar, ta NPF tirisa ashi.
Kenye-i Parliament nung Naga nunger taginübatem sayutettsü imlar. Taoba mapang Nagaland nungi Rajya Sabha züngsemtemi mapa junga meinyak ta masü saka Kenye ya lennir tejen ka aser pai Party o Naga yimten tebilemtsü indang otsü kanga junga meteta lir. Iba jagi pa dak teimla tulu lir, ta paisa ashi.
Chief Minister TR Zeliang-ia o jembidang, CWC-i telemtetba tajung agiba tenüngsang agütsü.
Tenüng agütsürtem ajakji yimten mapa inyaker takoktetpurtem dang lir aser iba jagi candidate shimtsübaji kanga tasak liasü, ta TR Zeliang-i ashi.
Parnok den yariteper BJP-ia parnok party indang candidate ka yoktsü atema maongka meshi saka DAN candidate ama Kenye shimba telemtetba BJP-ia agizükogo, ta paisa ashi.
Naga nungeri KG Kenye dang nungi aika imlar. Parliament nung Naga nunger atema aser terenlok atema jembiba dang masü saka Naga yimten tebilemtsü atema telemtetba ka agitsü atema pa dak teimla ayur, ta paisa shisem.
Tanü K G Kenye-ia, CWC aser NPF den yaritepba teloktemi aginüba tongteta inyaktsü atema merangtsü ta ashi.
Iba sentong nung NPC vice president Tsumongo Ovung menden liasü aser CBCMH Kohima Senior Pastor, Rev. Dr. Vevo Phesao-i temoatsü meshia sarasadem.