NPF-i Lok Sabha by-election nüboyimba tenzükogo; Khristan yimsü dak temulung lemra C Apok Jamir nem vote agüjang

May 16, 2018 nü Ura Academy Hall Kohima nung Lok Sabha by-election atema NPF-i nüboyimba sentong tenzükba nung NPF candidate C Apok Jamir den NPF Tir Dr Shurhozelie, Opposition lennir T R Zeliang aser tangartem külemi agiba noksa angur. 

Kohima, Monupii (May) 16 (TYO): May 28 Lok Sabha by-election atema Naga People’s Front (NPF)-i tanü nüboyimba sentong tenzükogo.
Nagaland nung opposition telok NPF-i nübortem dang Khristan yimsü dak temulung lemra C Apok Jamir nem vote agüjang, saka Hinduism dak temulung alemer süra Tokheho nem vote agüjang ta metetdaktsü.
Ura Academy nung NPF Kohima Division-i LS by-election atema nüboyimba mapa tenzükba sentong ayonga agidang NPF Tir Dr Shurhozelie Liezietsu-i NDPP-i jembiba onüktem aitsü.
NDPP-i parnok candidate-i takok ngura education, aluyimer aser lanurtem ajungkettsü atema inyaktsü ta metetdakja liasü saka Dr Shurhozelie-i ashiba agi, state nung MP ka ama pa/lai state sorkar atema mebilemtsüla saka Delhi-i oa Naga yimten tebilemtsü tekaratiba nung koktettsü atema mapa inyaktsüla.
Lok Sabha by-election ya BJP-NDPP aser NPF tsüngda tetoktepba ka lir anungji state nung alirtemi candidate dak dang merangloki party policy aser programme atemaa bilemtsüla, ta paisa ayongzük.
NDPP ya regional political party ka ta jembiba atema Dr Shurhozelie-isa ashiba agi, NDPP-BJP ka kümogo anungji NDPP-i regionalist ta jembiba atema Naga nungertemi jungjunga shisadangtsüla, ta paisa ashi.
Parnok indang candidate Tokheho ji regional masü kechiyong paji BJP atemaa candidate ka lir saka Apok ya regionalist candidate chichiba lir, ta paisa shisem.
NPF aser BJP na taoba küm 15 tashi yaritepa aru kechiyong Nagaland nungi Congress atsüngdoktsü atema 2003 küm non-Congress telok ajak longjem. NPF-BJP sorkar ka küma liaka onoki parnok den — Taoba state general election nung BJP-i menden lemsatsü tebilemba onoki magizük aser iba jagi parnok NDPP den aden, ta Dr Shurhozelie-i ashi.
“Jungang-tejung, Nagaland ya Khristan state ka lir aser Linük Temzüng ajanga tamangba yimsü dak sendakba maparen kümzüka ayutsü lateta lir, saka BJP sorkari tamangba yimsü amangtsü nüjiso alenbanga lir” ta NPF tirisa shisem.
Naga nunger longjemer Hindu aser Christian tepila metetdaktsütsü atema Lok Sabha by-election ya mapang tajung ka lir. Khristan tamanger ka ta süra C Apok Jamir nem vote agüjang saka Hinduism aginür süra Tokheho nem vote agüjang, ta paisa ayongzük.
Taoba MP aser tang teinyakdak Chief Minister, Neiphiu Rio-i mebilemdangi inyakba ajanga Nagaland nungi Lok Sabha menden ka atema by-election agitsüsa akümer, ta State Assembly nung Opposition lennir T R Zeliang-ia o jembidang ashi.
Taoba Rajya Sabha MP ka aser ex-MLA ka ama C Apok-i Parliament nung Naga nuger taginüba atema noktaktsü. Anungji, aika ajangshia aruba NPF candidate nem meratai dang vote agüjang, ta TR Zeliang-i ashi.
Tanga secular party tem aser talisa Congress-ia C Apok yaritsü ta shinüa TR Zeliang-i “NPF aser Congress teloktemi dang state ajungalen yimtsüng jenjang nung tera yanga lir,” ta ashi.
NDPP-i aniba PDA sorkari anogo 60 tsüngda District Headquarter nung gari lenmang ajak yanglutsü ta nangzükba atema TR Zeliang-i “parnoki kecha meinyaktet” ta ashi.
VIP sobaliba agientsü ta PDA-i jembiba atema paisa ashiba agi, “Parnoki name plate agienba ajanga VIP sobaliba agienogo saka asangsang nungbo parnoki political party nung lennirtem Cabinet Minister aser Minister of State jenjang nung backdoor appointment asüba den party mapa inyakertem Commissioner & Secretary, Secretary, Class-I Gazetted officer tem shimokba ajanga khuret ang talila bentsür aruogo,” ta ashi.
Tawa VDB fund ama sen crore 100 agütsüba atema paisa ashba agi, “PDA sorkari Naga nunger külakoktsür kechiyong NPF sorkari yaküm Khristmas matongdang 2017-18 atema VDB grant sen crore 283 bener aru, saka State general election agitsü osang sangoktsüba ajanga senji melemtet.”
PDA sorkar aruba sülen parnoki VDBs nem sen lema agütsü saka osang shitakbaji metetdaktsü. Parnoki nübortem külakoktsütsü akok saka kulikakettemji teti alitsü. NDPP-i aniba PDA sorkari gari lenmang aser yimtsüng nung alirtem ajungkettsü atema tebilemba mesüra alizüng kecha mali. Onoki PDA sorkar dang nungi kecha meimlar, saka onoki küm ka tashi repranga atatsü kechiyong tang parnoki inyaka aruba mapatem ya NPF sorkari tenzüka yutsübatem dang lir, ta TR Zeliang-isa shisem.
Naga nungertemi Lok Sabha election süoki ia mebilemer saka tanga state tem nungbo assembly election dang nungi parliamentary election ya tongtipangba ama züngshir, kechiyong state mesüra linük atema sentong ajakji Parliament nung dang yanglua agizüker, ta paisa metetdaktsü.
Nagaland nungi Parliament züngsem ka dang yokbaji amajok masü. Naga yimjung olemtep tongtipang mapang ka nung lir saka taoba ita pezü tashi Rio ajanga Parliament nung Naga nunger menden tazüng lir, ta Opposition lennirsa metetdaktsü.
Naga nunger aser NPF züngsem ajaki Naga yimten tebilemtsü atema Apok Jamir nem vote agütsütsü ayongzüker, ta TR Zeliang-isa ashi.