NPF-i Mhonsali Murry asüba mangyimer

Kohima, Metsüremi (March) 16 (TYO): Naga People’s Front (NPF) Tir, Dr Shurhozelie Liezietsu, Central Office Bearers aser party nung inyakertem ajaki MLA, Dr Chumben Murry tetsü, Wt. Mhonsali Murry yasüng asüba osang angashia mangyimer, ta tanü Press Bureau, Naga People’s Front, Central Headquarters, Kohima-i sangdong ka ajanga metetdaktsü.
Tetsü kaji melentettsü makok aser iba ama mangyim mapang nung party-ia mangyim lemsateper, ta sangdong nungsa shia lir.
NPF-i MLA Dr Chumben Murry danga, “Lai na ama jabaso tajung ka anitetba- shisaliok aser yimtenren nunga takok angutsüsa anitetba ajanga nütsüji komala nisung ka asüar jangjar. La meteta alirtemi laji temeim aketba nisung ka liasü, Tsüngrem tsübuba nisung, mapa meranga inyakba aser taochi aketba nisung ka liasü ta jembir. Asenok ajaki la dang nungi tatishitsü tajung agia benshitsüla, aser la asübaji asenok ajak atema takoksa lir,” ta lemsatep.
“Onoki na aser ner kinüngertem den mangyim lemsateper aser iba ama mangyim mapang nung Tsüngremi nü nem tesünep agujang ta sarasademtsür. La tanela tatem makai anisüngzükangma,” ta parnokisa lemsatep.