NPF-i Naga nunger ajungtsü atema dang inyaker: Dr. Shurhozelie

Kohima, Monupii/May 21 (TYO): Naga People’s Front (NPF) Tir, Dr. Shurhozelie Liezietsu-i, 1960s mapang Naga lokti nung makmakshimak aliba tensa ka nung NPF ya tentet, aser party atema tongtibangtiba onükji Naga yimtenren onük latettsü atema liasü, aser tanüa kasa onükji tongtibang, ta metetdaktsü.
Tanü Jalukie nung Lok Sabha bye-election atema nüboyimba lokti senden nung jembidang Dr. Shurhozelie-i, NPF party-i lenir mesüra party kar maitsüner saka Naga nunger ajungtsü atema dang inyaker, ta metetdaktsü, ta Press Bureau, Naga People’s Front, Central Headquarters, Kohima sangdong ka nung metetdaktsü.
Paisa, tang PDA nungi Chief Minister, Neiphiu Rio-i Lok Sabha by-poll atema state tesem aika nung nüboyima senzüdar, aser pai NPF Legislature Party Lenir, TR Zeliang aser NPF party dang aija jembir; mangdang aliba chichiba lenir kati nübur atema terenlok sentongtem indangang jembitsüla, ta ashi.
Dr. Shurhozelie-isa, NPF Official candidate, C Apok Jamir ya kanga tetemsü ta shia pa nem vote agütsütsü mepishi.
Taoba Chief Minister aser NPF Legislature Party lenir, TR Zeliang-i, Chief Minister Neiphiu Rio-i sentong ka nung jembidang NPF ya telok asem küma lemsar lir ta jembibaji tai; iba ya nüburtem mangmangdaktsütsü atema yimtenren nung olulu jembiba dang lir, ta metetdaktsü.
“Atangji nungbo, Rio-i NPF MLA tem lemsadaktsür NDPP MLA tem timba küma teloktep BJP sendoktsü atema jembiba lir, kechiyong BJP-i atsünga oa inyakba pai ngudar,” ta Zeliang-isa ashi.
TR Zeliang-i, Rio-i pa MP inyakba mapang nung pa NPF Lok Sabha züngsem süaka NPF party raksadaktsütsü merang, ajisüaka Rio-i NPF meraksadaktsütetba atema Tsüngrem dang pelar, ta ashi.
Taruba Lok Sabha election dak sendakba nung Zeliang-i, Naga nungeri NPF candidate Apok Jamir nem vote agütsütsü ta amanger; Apok Jamir-i lenir ka ama aika ajangshia lir aser MP den state nung tongtibang menden aika nung inyakdanga lir, ta ashi.
Kasa sentong nung NPF otongdar, Achumbemo Kikon, MLA, Moatoshi, taoba MLA Hukavi aser taoba mapang BJP lenir Zandi Domta nungeri jembia liasü.
Iba sentong ya NPF treasurer aser Peren district nung campaign committee convenor, NR Zeliang leniba nung agia liasü.