NPF-i Naga nunger anisatsü atema tiyazü osangtem jembir: Rio

Kohima, Tsüklai 20 (TYO): NDPP-BJP teloktep ajanga Naga nunger tamangbaren nung timtem bentsür arutsü ta NPF-i tiyazü osangtem prokba nung mamangtsüla ta tanü NDPP Chief Ministerial candidate, Neiphiu Rio-i ashi.
8-Western Angami A/C nung NDPP candidate Kevisekho Kruse atema nüboyimba sentong ka nung jembidang Rio-i “Onok (NDPP)-i tamangba yimsü melentsü atema BJP den tesentaktep yangluba masü saka Arrla 371(A) nung aliba ama asen temetentem kümzüka ayutsü atema lir, kechiyong Centre sorkar den tesentaktep ayutsübaji kanga tongtipang” ta ashi.
India Linük Temzüng nung Arrla 25 aser 28 ajanga senso ajak nem tamangba nüjiso agütsür, anungji asenok tsübutsü nüngdak mali kechiyong Linük Temzüng ajanga asenok temetentem kümzüka ayur, ta paisa shisem.
“Khristantem ama onoki Khristan tangatetba aser tesayubatem nungi mainshitsü aser NDPP-i Naga nunger sobaliba aser inyaksangshitem kümzüka ayutsü. Ajak dang tematibaji, Arrla 371(A) ajanga Naga nunger temetentem kümzüka lir aser Parliament indang Act kecha Naga nunger madak tashiyim agi benoktsü makok” ta Rio-i metetdaktsü.
Nagaland nung NPF-i aniba DAN sorkar küm 15 aruba nung ni küm 11 tashi chief minister inyakdang BJP dak sendakba timtem kecha majuru, saka TR Zeliang aser Dr Liezietsu nati küm pezü ketdangsüa arudang, langka mejungi inyaksa aser iba jagi Naga nungertemi BJP tsübur, ta paisa ashi.
TR Zeliang ya ochimashi aser tiyazü jembiba lennir ka lir aser pai public sen miimzüka agiba den taila tazüngba kulikakettem agütsü. TR Zeliang aser Dr Liezietsu nati Chief Minister inyakogo saka tenati ketdangsüba mapang terenlok mapa kecha maliasü, kechiyong tenati vote alizüktsü atema sen miima rizüng. Parnoki sen indang politics asayar aser iba jagi NPP candidate tem ang yariteter, ta Rio-isa shisem.
TR Zeliang aser Dr Liezietsu nati telemtetba tai agiba ajanga urban Local Bodies indang election mapang state ajunga nung tensa mejungi aküm. Tena ya telemtetba tai agirtem lir aser tarutsü alizüng kecha mali, anungji Naga nungertemi tan election nung lennirtem kanga dang kümdanga shimtsüla, ta paisa ayongzük.
Taruba state sorkarji NDPP-BJP teloktep akümtsü. NDPP-i sorkar ketdangsübaren kanga junga inyaktsü aser tashishitsü melii inyaktsü. Onoki gari lenmang aser connectivity tajung bener arutsü. Ozü sorkar akümba sülen anogo 100 tsüngda policy ajak mapa küma inyaktsü, ta Rio-isa ashi.
Kobi melii NDPP-BJP teloktepi common minimum programme ka yanglutsü aser ibaji ajanga Nagaland renloktsü aser tejakleni anir aotsü, ta paisa shisem.