NPF-i Naga nunger ashioktsür: NDPP

Kohima, Monupii (May) 25 (TYO): Naga People’s Front (NPF)-i teinyaktsü onük kecha melii Naga nunger külakoktsütsü meranger ta Nationalist Democratic Progressive Party (NDPP)-i tanü ashi.
“NPF lennirtemi nübortem ajungkettsü atema teinyaktsü sentong kecha mali aser parnoki Naga nunger ratamatadaktsütsü meranger” ta NDPP candidate, Tokheho Yepthomi atema Chief Agent, Prasielie Pienyu-i ashi.
PDA sorkar ya ita ana dang tain lir saka election nung nangzükbatem mapa küma inyaka arudar aser tesüiba küm 2 indang VDB sen agütsüba den district headquarter lenmang yanglushir, ta Pienyu-isa ashi.
PDA sorkari nübortem tiptema lidaktsütsü atema bilemer aser state assembly election nung tamakok anguba sülen NPF-i ‘An tebong’ tamaitsü aliba nungi tangbo ‘Broiler’ melenogo, ta paisa shisem.
NPF-i tamangba tsütsü onük densema tanga onük aika nung NDPP-i aniba PDA dak tai tongloktsür, kechiyong parnok teinyaktsü telatetba kecha mali aser iba jagi parnoki Naga nunger mangmangdaktsütsü meranger, ta Pienyu-isa shisem.
Lok Sabha by-election nung Tokheho Yepthomi-i takok angutsü saka onoki vote agütsürtem dang Prime Minister Modi’er terenlok mapatem Nagaland tonga arua inyaktsü atema pa nem takok tulu ngudakjang ta mepishir, ta paisa ashi.