NPF-i Naga nunger taginüba nungi kodanga mepilatsü: Achumbemo

Kohima, October 19 (TYO): Naga Peoples’ Front (NPF)-i Naga nunger taginüba akhümtsübur, aser iba nungjagi kodanga mepilatsü, ta tanü NPF otongdar, Achumbemo Kikon-i metetdaktsü.
NPF 9th Kohima Town Assembly Constituency office semzükba sentong nung jembidang Kikon-i, “North East nung regional Party tejentiba ka ama NPF-i nüburtem atema nokdaker. Party MLA tem aser lenir kari tang party nung mepetmesü adokdakjaka, Tir Dr Shurhozelie Liezietsu leniba kübok party nung inyakertemi party temzüng kümzüka ayutsü atema inyakba nung ibaji tetsükdaktsü mesüdaktsütsü,” ta ashi.
Pai ashiba agi, October 17, 2017 nü Election Commission of India (ECI)-i NPF party indang election temaitsü dak sendakba nung NPF dang General Convention ka mena latettsü metetdaktsüogo; Party temzüng nung, Election Commission dang majority sayutsü atema NPF Central nem tashi shilem 99.9% agüja lir.
Paisa, “NPF MLA tem aser Party lenir kari Naga nunger anisatsü atema ozüng alema September 20, 2017 nü Dimapur nung general convention ayonga agi, saka Commission tetuyuba ajanga ibaji tai ta kuli sayuogo,” ta ashi.
“Parnoki ozüng alema general convention ayonga agibaji ECI-i magizük, iba den külemi parnoki mashi lenmang ajanga temzüng alema NPF Party agitsü merangba aser Party maitsü den wako ozüng alema amshitsü merangba magizük,” ta Kikon-isa ashi.
Iba dak sendakba nung pai Party nung inyakertem dang party tangatetba nungi masetshi-i akhanga nokdaktsü aser longjemer inyakba ajanga NPF party ano sorkar tashii arutsü atema meranga inyaktsü ayongzük.
Paisa, 2014 küm November ita nung General Convention nung Tir, Shurhozelie Liezietsu aser pai aniba office ketdangpur shimba maneni nungittsü atema NPF Central-i ano General Convention ayongzüka akatsü, ta metetdaktsü.
Kikon-i, Kohima Town Assembly menden ya akhümket menden ka lir, anungji taruba election nung iba menden nung takok angutsü atema Unit lenirtem aser party nung inyakertem amalitepa inyaktsüla, ta mepishia metetdaktsü.
“NPF-i tanaben takok ngua party toktsür MLA tem medeni sorkar akumtsü, aser nübur tajungtiba agi tenzüktsü,” ta paisa ashi.
Kasa sentong nung NPF Kohima Division Working President, Kesoneilie Theünuo aser NPF CEC Member, Neivulie Kiewhuo natia jembia liasü.
Iba sentong ya NPF 9th Kohima Town A/C general secretary, Neiba Bio leniba nung agi, Tir, Neizokhotuo Belho-i tesentepertem pelaa agizük aser Women Wing Tir, Ari Kintso-i tepela anküp o jembia liasü.