NPF-i Naga yimten latettsü atema inyakba nung maneni yariteptsü

Kohima, Metsüremi (March) 13 (TYO): Küm 15 tashi sorkar ketdangsüa aruba sülen Naga People’s Front (NPF) pur tang opposition bench nung amener aser tanü parnoki Naga yimten latettsü atema Nagaland nung tashi tait sorkar ka nüngdaker ta ashi.
“State nung kodang loksa aotsü’ar memetetba teloktep sorkar ka ajanga terenlok bener marutetbaji yutsür, Naga yimten latettsü atema yimtenren mesüra lokti indang tayongzükbatem mokoktettsü” taoba minister aser kümsük pezüben tashi MLA, Imkong L Imchen-i ashi.
Tesüiba küm ishika Naga nungertemi Naga yimten latettsü atema kanga aginüa arur aser iba jagi NPF party-i 13 buba NLA indang election magii tamasa Naga yimten tebilemtsü atema inyaktsü tayongzükba agütsü, ta Imkong-isa ashi.
Ajisüaka, India sorkari election agiyonga Naga yimten tebilemtsü dak sendakba mapa nung tetsükdaktsü kecha majurutsü ta bilem.
“NPF Party-i assembly nung sorkar akümtsüsa mendenbo peria mongutet saka onoki menden teimba nung takok angutsüsa maongka agütsüba atema Naga nunger ajak dang kanga pelar” ta Imkong-isa metetdaktsü.
“Election maparen inyakba ajanga Naga yimten tebilemtsü indang olemtep anendaka alibaji tenzüka aotsü aser tekaraba nung telemtetba ka agitsü onoki imlar” ta paisa shisem.
Prime Minister Narendra Modi-i mapa inyakba kanga pelashishia agizükogo aser pai Naga nunger dang telemtetba ka agitsü ta ashiba nung asenoki arentaka bilemtsü kecha mali. Asenoki kobi melii Naga yimten latettsü imladi, ta Imkong-isa ashi.
“Jawaharlal Nehru aser Indira Gandhi nati tamakok nguaka Modi-i Naga yimten latettsütsü ta nibo bilemer” ta paisa shisem.
Naga yimten melatetra state nung tajung aser tamajung tensa balala ajurutsü aser iba ama mapang ka nung tashi tait sorkar ka alitsü nüngdaker,
NPF-i tang teinyakdak mapa pusema nungittsü aser ajaki agizüktettsüsa Naga yimten ken o latettsü atema yariteptsü. NPF ya opposition bench nung menaka, züngsem 60 agi akümba assembly nung onok MLA 26 lir anungji onoki nüngdakba ajak nung yariteptsü, ta Imkong-i ashi.
“State Assembly indang election ji küm pungu shia khen ajurur aser iba ya Linük Temzüng nung aliba teinyaktsü ka lir, saka Naga yimten latettsüba yabo teti inyakba aruba mapa ka ama masü” ta paisa shisem.
NPF sorkar ka akümtsü atema tanga political party tem den jembitsü meranger asü masü ta osangbeneri asüngdangdang, “onoki mapa inyakdar saka tang tashi nung onoki tanga political party shinga dena mejembitep” ta pai langzü.
“Onoki JD(U) aser NPP den pre-poll alliance liasü saka tanü parnoki onok den tenangzükba agiba meyipa magii NDPP-i aniba PDA sorkar den adentsü lemtetogo. Kasaji BJP-ia inyakogo” ta Imkong-isa shisem.
BJP-i NDPP den menden lemsateptsü telemtetba agiaka onok tsüngda tesentaktep meraksai lir aser onoki parnoki lemtetba anema ola madok, ta paisa metetdaktsü.
NPF-i NSCN(K) atema kechi bilemer ta asüngdangdang Imkong-i “NPF-i parnok dang yimjung olemtep nung denang ta mepishia arur aser taoba Chief Minister T R Zeliang-i shidi ana-asem ka züluogo saka NSCN(K) nungi telangzüba kecha mali” ta langzü.