NPF-i nübur dang tadok meshir: K G Kenye

Kohima, September 14 (TYO): Brihostibarnü Naga People’s Front (NPF) Central Headquarters-i party telung nung mepetmesü adokba ajanga Naga nunger nem khuret agütsüba atema tadok meshi.
Tanü nikongdang Kohima nung osangbenertem den jembidang NPF Central Headquarters Secretary General, K G Kenye-i, “Onoki (NPF) ashioktsüba atema Naga nunger dang tadok meshitsü lir. Nüburi asembenren tashi ozü party dak tamang kaogo, saka iba tamangji onoki raksatsü,” ta ashi.
Kenye-i, “Onoki terenlok mapatem nung rangloker inyaktsü melen, aser election manifesto nung nübur dang nangzükbatem inyaktsü melen MLA tem aser Party nung inyakertemi khuret mebeni inyakogo,” ta ashi,
“Anungji Party nung Secretary General ka ama ni onok mapatem atema state nüburtem dang tadok meshir,” ta paisa ashi.
Kenye-i, “Party tangatetbatem nung ali tashi parnokji party shilem ka lir aser züngsem tajung ka ama alitsüla. Party temzüng kübok melitetra NPF telung nung timtem magütsüi pei sasa anener party tasen ka nung adentsüla,” ta ashi.
“Nüburtem terasaba aser tejashi onok madak lir, aser NPF Party den MLA temi iba nungjagi mejenbutettsü. Onok yimsüsüba yimya ajanga nübur tamang aser teimla khenyongi raksatsüogo,” ta pai ashi.
Item ajunga ya NPF telung nung raratepa mepetmesü adokba ajanga lir, ta paisa shisem.
“2018 state election kanga kera arudar, ano yimsüsütsü atema NPF-i nübur koda ajurutsüar ni shisabulua bilemer. Anungji Party lenirtem aser MLA temi pei aibelen rajemer mangatettep aliba bentettsü atema mapang tongogo,” ta paisa metetdaktsü.