NPF-i ochi jungkai adokdaktsütsü: Yitachu

Kohima, October 27 (TYO): Party kibur, MLA tem disqualify asüba aser NPF Legislature Party leader o Chief Whip shimba atema mangatettep adoka aliba onüktem atema Naga People’s Front (NPF)-i ochi jungkai adoka sayutsü.
NPF Central Youth Wing-i State Assembly Speaker anema lungkak ait tenzüker anogo pungububa nung agidang MLA Yitachu-i iba o jembi.
Governor P B Acharya aser Speaker Imtiwapang Aier nati India Linük Temzüng aser State Assembly inyakyimtem alema mapa inyak. Tang temulung masüba MLA temi tatemzüktsütem agüja mapang atsülangtsü meranger aser okadak-a parnoki tatemzükbatem agütsür, ta Yitachu-i ashi.
“State sorkari bilemba ama dang inyakdi ta asüba agi Naga nungertemi joko ozüng amertem dak-a temulung malemtsüsa kümogo” ta paisa shisem.
TR Zeliang’er teloki NPF MLA 10 anema disqualification petition benokba angadangtsü atema yashi Assembly Speaker-i anogo latetogo aser iba atema pelar. July 19 Assembly Session nung Trust Vote benoker shianga maliasü aser iba jagi Speaker-i mapa inyaka moutet, saka Zeliang’er teloki onoki anema disqualification petition ka benok aser ibaji October 31 nü angadangtsü ta Speaker-i anogo lemtetogo, ta paisa ashi.
Sorkari mapang atsülangtsü atema mapa balala inyaker saka parnoki yamaji inyakaka, onok ochi jungkai adokdaktsütsü, ta Yitachu-isa shisem.
“An tebong tamaitsü NPF Party-i kodanga Naga nunger asoshi tamakok bentsür marudang. Naga nungeri aginüba ama onoki 1998 State General Election nung shilem magi aser iba jagi Election Commission-i onok indang tamaitsü noksa dena sota ayutsüsa mapang ajuruogo” ta NPF Spokesperson Achumbemo Kikon-ia ashi.
Neiphiu Rio aser T R Zeliang na teloki parnok NPF Party kibur ta tiyazü shia Naga nunger külakoktsütsü meranger. Ajisüaka, October 17 nü ECI-i tetuyuba agütsüba nung Rio aser Zeliang na telok magizükba aser Shurhozelie-i aniba NPF telok dang general convention ayongzüktsü shia shia lir.
Rio aser Zeliang na telokji NPF Constitution kübok mali anungji parnoki jembiba nung tametdak kechi mali, ta Achumbemo-isa shisem.
Honibar aser Deobar anogotem sodi alitsü aser October 30 nungiang lungkat aitba sentong maneni tenzüktsü, ta NPF Youth Wing President N Vihoshe-i metetdaktsü.