NPF-i Party President Dr. Shurhozelie pusemer; Rio aitsür

Dimapur, August 1 (Agencies): NPF nungi anenja aliba züngsemtem den NPF MLA kari Party President dang anogo 15 tsüngda menden nungi alung ta tuyuba aser Lok Sabha MP Neiphiu Rio “interim NPF President” shimbaji magizüker, ta Naga People’s Front sangdong ka nung metetdaktsü.
NPF Constitution nung President dena Central Office Bearers shimba indang temzüng tejangja lateta lir aser Constitution nung party MLA temi pei bilemba aser aginüba ama inyaktsü ozüng kecha lateta mali, ta Media & Press Bureau, NPF, Central Office Kohima sangdong nung shia lir.
NPF President Dr Shurhozelie Liezietsu aser pai aniba Central Office Bearers ya November 2014 nung küm pungu atema inyaktsü shimtetba lir. Maneni March 2015 nung Election Commission of India-i tetuyuba agütsüba ama, April 30, 2015 nü Emergent General Convention ka ayonga agi aser idangji NPF züngsemtemi tang teinyakdak ketdangpurtem pusema nungiter ta teka metongtepa sayuba kuli ECI nem agütsü aser parnoki iba videographic kuliji mulunga agizük, ta sangdong nungsa ashi.
State Banquet Hall ji party President mesüra party lennirtem shimba tesem masü aser ano party Constitution nung “interim President” tetshia mali aser iba mapa indang temzüng kecha lateta mali. Party MLA temi temzüng ozüng sülen manidaki, party President shimbaji kecha tetezü mali aser Naga yimten putiotsü nung Rio ji imaginary political party ka nung self-styled President ka ta züluoktsü, ta NPF sangdong nungsa metetdaktsü.
Kanga dang teratatsü aketba onük kaji, social media nung NPF züngsem 13-i teka agi sign asüba shidi ka prokshiba nung keta lir. Sign asür rongnung Lirimong, PA to MLA Torechu dena lir, aser parnoki July 10, 2017 nü ang “Chingwang Konyak, President, DPP Nagaland aser Neiphiu Rio, Hon’ble MP Nagaland” lenisüba kübok Democratic Progressive Party pusema nungiter ta nangzükba osang metetdaktsüogo.
Tang NPF party nung mepetmesü adokba ya shirnoki inyakar MLA temi kanga junga angatettsüla, kechiyong iba ken o tembang tashi nungbo nenok jenokdak malitsü. State adena orr, BJP teyari agia Kaziranga nungi sorkar atsüngdoktsü merangba MLA tem jagi tang NPF party nung iba khuret adokdaktsü. Parnoki tashi aginüba atema dang party organisation aser legislative wing tsüngda telemsa adokdaktsü, saka kija kar aser Constituency units kar dak alaka, tanüngba party pur ajaki party president den nokdaka lir.
2004 küm MLA temi taoba Chief Minister Neiphiu Rio anema nokdakba mapang party President Dr Shurhozelie Liezietsu-i pa kümzük. Kasaji 2015 nunga Rio-i aniba NPF MLA temi TR Zeliang atsüngdoktsü merangdang Dr Shurhozelie-isa TR Zeliang kümzük, saka tanü parnoki pa dang pelatsü melena pa atsüngdoktsü merangba aser pa anema o tamajung jembiba angudang temulung raksar.
Taküm January-February nung Naga loktiliba nung tensa khenyongi tamajung kümer aliba mapang, Dr Shurhozelie dak ashikülaker ta ajar item MLA temi February 15 aonung pa dangi ao aser parnok nüktzü atsüngdener, pa dang party aser DAN sorkar kümzüktsü atema yimlibilema Chief Minister inyakang ta mepishia liasü, ta sangdong nungsa ashi.
NPF nung lennirtem aser züngsemtemi party President pusema nungiter aser MLA temi party tokjang ta shia sen agi alizüktsü merangaka, ibaji magizüki pa den nokdaker. NPF party tajungba kümogo aser party züngsemtemi MLA temi mesüzükba sülen manidaki, political party nungi masetshii nokdakba atema temulung anisüngzüker. Iba ama tensa nung party workers-i party nungi masetshii nokdakba atema NPF Central Office-i kanga pelaba metetdaktsür, ta sangdong nungsa shisem.