NPF-i PDA sorkar dang RIIN mapa meinyaki atatsü ayongzüker

Kohima, August 7 (TYO): Naga People’s Front (NPF)-i Nagaland sorkar dang Register of Indigenous Inhabitants of Nagaland (RIIN) maparen sota atatsü aser sendaka alir ajaki haihaura maka tashi iba mapa meinyaktsü atema ayongzükogo.
Bodbarnü Kohima nung NPF Central Executive Council senden amendang NPF-i sorkar dang RIIN maparen inyakba ajanga Naga loktiliba asoshi khuret talial bentsür marui, Inner Line Permit (ILP) mapa ang inyakang ta ashi.
RIIN onük yagi Naga nunger ajak tarutsü nung kongshir saka People’s Democratic Alliance (PDA) sorkari iba onük süoki ia mebilemba atema mepelar, ta NPF-isa ashi.
Tang tensa nung inyakyim tasen ka bener aruba ajanga Naga nunger tsüngda aser ano Nagaland nung aliba indigenous communities tsüngda telemsa ang tali adokdaktsütsü ta NPF-isa metetdaktsü.
NPF Party Constitution nung Naga nunger tesem ajak ketdangsüba ka kübok kümdakja telongjem atema inyaktsü aser Naga Ancestral Areas nung lisopur ajak kümzüka ayutsü ta lateta lir, anungji iba tangatetba nung NPF-i maneni noktaktsü, ta parnokisa shisem.
NPF CEC-isa Nagaland Governor inyaktsü atema R. N. Ravi shimba pelaa agizükba metetdaktsü.
R. N. Ravi-i Governor inyakba ajanga Indo-Naga Peace Process aser yimten olemtep tashitaitba akümtsü imlar, kechiyong August 3, 2015 Framework Agreement sign asüba nung pai tongti shilem agiogo, ta NPF-i metetdaktsü.
India sorkar aser Naga yimten mapa inyakertemi telemtetba tajung ka tekaratiba nung agitsü atema olemteptsü ayongzüker, ta parnokisa ashi.
Yimjung maparen nung madenba teloktemia iba mapa nung shilem agitsü atema mepishir, ta NPF-isa shisem.
Central Office Bearers aser Frontal Wings ketdangpurtem election atema NPF CEC-i president nem Central Election Board tentettsü tashi agütsü.