NPF-i RD Principal Secretary merenshitsü akhanger

Dimapur, Rongchii (April) 27 (TYO): Rongchii (April) 27, 2018 nü De Oriental Grand, Kohima nung NPF Legislature Party senden ka amendang Principal Secretary, RD Department Lhoubeilatuo Kire-i tetsübu kecha melii toktepba onük benoka olemtep aser iba dak sendakba nung bangzüng kar renem.
Lhoubeilatuo Kire-i Dimapur district kübok yimtsüng ka nem senotsü alakteta lemzüktsüba atema NPF-i osang metetdakja liasü. Ajisüaka, pai lokti tentet balala ajungmesor NPF Legislature Party lennir ang amokmerenogo aser iba ya sorkar mapa inyaker ka memesük lir, ta tanü NPF Legislature Party senden nung jembi.
Kire-isa osangkaket balala nung pai Rongchii (April) tetenzüklen nungiang RD Department ketdangsütsü mapa tenzük ta tiyazü osang sangdong saka sorkar kulikakettem nungbo pai Metsüremi (March) 17, 2018 nungi RD department ketdangsütsü tenzük ta shia lir.
RD Principal Secretary-isa NPF Party dang CGI sheets alemba, Department garitem, office stationeries tim mesüi amshiba indang kuli agüjang ta ashi saka iba ya teratatsüka lir kechiyong NPF party-i kodang item onüktem mejembi, ta NPF Legislature senden nungsa jembi.
NPF Legislature Party (Opposition) lennir T.R Zeliang nem anogo latettsübaji magizüker aser iba ya democratic inyakyim anema lir. Talisa Opposition lennir dak tai tongloktsübaji Opposition MLA shia anema apusoba ama lir. Anungji, Service Conduct Rules kübok sorkari RD Department nung Principal Secretary Lhoubeilatuo Kire merenshitsü takhangba agütsür, ta NPF-i metetdaktsü.
Rural Development Department-i tekaratiba nung Dimapur District kübok aliba yimtsüng shia indang MNREGS dak sendakba osang tejangja metetdaktsütsü akhanger, ta parnokisa shisem.