NPF-i Rio & T.R. Zeliang den parnok 9 tanaben agizüker

Kohima, Jul 13 (TYO): Tang Nagaland nung NPF pur tatartem rongnung mepetmesü adokba maparen nung meimlaika Naga People’s Front (NPF)-i parnok telok nungi ‘suspend’ süja alirtem parnok 11 tanü tanaben agizükogo.
Item rongnungji taoba chief minister aser tang Lok Sabha, M.P. Neiphiu Rio aser taoba chief minister aser tang MLA T R Zeliang na dena lir.
Neiphiu Rio ya yaküm küm May 17 nü suspend sütsü aser tanüngba parnok terji, T.R.Zeliangi anir tang temendak chief minister, Shurhozelie anema apusoba agi taoba hopta July 8 nü suspend süja liasü.
NPF tatar par terka suspend sütsür aliba tanaben meyipa agizükba telemtetbaji tanü Brehostibar nü NPF Legislature Party den NPF Central Party lenirtem senden ka Chief Minister aliba official kidang senden ka mena lemtet ta NPF Working President, Apong Pongener-i metetdaktsü.
Iba senden nung amenertemi tang mepetmesü adoka aliba ya NPF tebilemtsü lir, anungji NPF telok nung putepshia tangatettep kati arutsü asoshi inyaktsü renema akaba ama, NPF aser ano talia Naga nunger ajangzüktsü mechi parnok terka suspend süja aliba telemtetba agienogo ta paisa ashi.
Rio aser Zeliang na den ‘suspensions orders’ agienertemji Y. Patton, C. Kipili Sangtam, G. Kaito Ate, Imkong L. Imchen, Shetoyi, Nuklutoshi, Deo Nukhu, Naiba Konyak aser Benjongliba Aier nungertem liasü.