NPF-i Speaker anema longkak ait manener

Kohima, October 26, 2017: Brihostibarnü Kohima nung NPF-i Civil Secretariat kima mener longkak aitba sentong nung NPF MLA tem aser volunteer tem kar tangokba noksa nung angur. 

Kohima, Oct 26 (TYO): Nagaland tatar senden nung Speaker-i Dr.Shurhozelie-i aniba NPF teloki akhangba mapatem meinyaktsüba agi tejashi marem tanü Brehostibar nü agi anogo pezünübuba Kohima nung Civil Secretariat kima longkak aitba sentong ayongzüka kadagi.
NPF teloki Speaker nem agüja aliba onüktemji Dr.Shurhozelie-i aniba government nungi medeni aor NPF tatartem tatar senden züngsem nungi züngdoktsü asoshi aser ano NPF party whip asütsü atema MLA Yitachu aser NPF Legislature Party lenir asütsü atema Kuzholuzo Azo Nienu shimtetba mapatem agizüktsü asoshi agütsübatem asütsü.
Tanü Brehhostibar nü Kohima nung Naga People’s Front (NPF) Central Youth Wing-i ayongzüka longkak aitba tesem nung NPF general secretary Akho Leyri-i jembidang, NPF tatartem rongnung parnok 36 tashi agi parnok teimba ta ser government bener aoba ya linük temzüng ozüng anema Nagaland Angh, P.B.Acharya-i government kümtsüba ajanga lir aser tatar senden nung Speaker, Imtiwapang Aier-i linük temzüng aser Assembly ozüng anema inyakba ajanga ataloker, ta metetdaktsü.
“T. R Zeliang-i aniba telok nung NPF telok nungi adokba MLA-tem teimba alitsüa akok saka NPF telok nung lenirtembo asenok den teimba lir,” ta paisa ashi.
India temzüng Tenth Schedule nung shia aliba ama, Party whip aser Legislatue Party lenir ya MLA-temi masü saka party-i shimer ta NPF lenirisa metetdaktsü.
“Parnoki temzüng nung manidaktetrabang, government-a bener maotsüla, T.R.Zeliang telok yagi nübortem mashileni anir,” ta paisa metetdaktsü.
“Parnoki temzüng ozüng ajak alema oagi yimten tashi aginüba mapa ajanga Naga nungertem tangar tsüngdanga nümamadangtsüsa kümogo,” ta paisa metetdaktsü.
NLA Speaker-i pa teku (brother-in-law) pu asemtsübaji masü saka Assembly temzüng ozüng agi melaba ama inyaktsüla, ta Leyri-isa metetdaktsü.
Anungji, Speaker-i MLA Yitachu Party Whip asütsü shimba aser Kuzholuzo Azo Nienu NPF Legislature Party lenir asütsü shimbaji tekaraba nung agizüktsüla, ta paisa metetdaktsü.
Tanü kasa senden nung NPF MLA P. Longon-ia jembidang, Nagaland nung regional party tejentiba NPF meimertemi Naga nunger temeten aser sobaliba kümzüka ayutsü meranger saka Neiphiu Rio aser T R Zeliang nati itemi raksatsütsü meranger ta aitsü.
Ano, külen Nagaland nungbo Governor aser Speaker nati India temzüng dena raksar ta paisa metetdaktsü.
Ano, kasa senden nung MLA Y Vikheho Swu-ia Dr. Shurhozelie den maden aor parnok MLA 36 aija metetdaktsüdang, tang ya Naga yimten tebilemtsü ken o telemtetba ka dangi arutsü amai teimla aliba agi, parnok MLA 36-i parnok temeten sen yong ayoktsü meranger ta metetdaktsü.
Paisa ashiba agi, October 17 nü Election Commission of India-i agütsüba telemtetba nung Dr. Shurhozelie-i aniba NPF telok dang ita ana tsüngda lokti senden jazüktsü shia lir, anungji iba senden nung adenertemi tajungba ka lemtetdakjang saka RIO teloki inyaktsübo kecha shia mali.
Anungji, Rio teloki Election Commission nem agütsüba shidi aser September 20 nü Dimapur nung lokti senden akaba ajak tamagitsü kümogo, ta Swu-isa aitsü.
Iba ama mapang nung Assembly nung Speaker-bo kecha telok tsütsüa tejak mashitsüla aser mapang shitak nung telemtetba shitak agütsütsüla, ta paisa ashi.
NPF lanurtemi longkak aitba sentong ya ochi telemtetba ka mangu tashi maneni aotsü ta metetdaktsüogo.