NPF-i Special Prayer Programme agi

Dimapur, October 10, 2025 (TYO): Naga People’s Front (NPF) aser NDPP lokteptsü asoshi mapa inyakba nung temoatsü alitsü atema NPF Central Office nung Special Prayer Programme ka agiogo.

Nübortem sarasadem ajanga NPF aser NDPP lokteptsüba ya asangsang nung ataloktsüsa mapang arudar ta MLA aser Leader of the NPF Legislature Party Kuzholuzo (Azo) Nienu-i ashi.

“Nisung aikati NPF ta tashimait aser teküpokba jenjang nung lir ta bilem saka tashi angutsü. Züngsem ajaki ochishia alitsü aser külem purtem aser party den tasü itta noktaktsü ayongzüker. Nisung ajaki ajemalua alitsüla aser party ana lokteptsüba anogo atema sarasademdi” ta Azo-i ashi.

NPF President Apong Pongener-ia o jembidang Special Prayer Programme ayongertem nem tenüngsang agütsü.

NPF party tenzükertem bilemteter aser parnoki tayongzükba jenti ajuruaka party inloka aotsü atema tamendakdak takang yutsüogo. Tanü lennirtemi tesüiba lennirtem senmang dak rangloker inyaksangshitsüla aser telongjem nung tejakleni aotsüla ta pai ashi.  “Asenoki party atema dang masü saka Naga nunger ajak asoshi sarasademdi. Asenok ka küma loktepba anogo atema sarasademdi” ta Apong-isa ayongzük.

“Regional party ana lokteptsü mapang tonga arur. NPF-i timtem aser tayongzükba aika ajangshia aruogo saka tamang aser aremzükba ajanga asenok noktaka lir” ta NPF Central Women Wing Advisor Sano Vamuzo-i ashi.

“Tanü Naga nunger tsüngda telemsa adoka lir anungji telongjem aser tanüla tsütsü asentenshi nüngdaker. Iba sarasadem sentong ya mapang shitak ka nung agir aser züngsem ajaki Tsüngrem shisatsü meshitsü, party atema Pa nükjidong angatettsü aser Tsüngrem o NPF tenzükba tangatetbatem nungi mepilatsüla” ta Sano-isa ashi.