NPF-i state sorkar aitsübaji tamendakdak maka: Manipur MLA

Imphal, Feb. 15 (Agencies): Naga Peoples’ Front (NPF)-i, Manipur sorkari NSCN (IM) aser Centre sorkar “Framework Agreement” nung tetsükdaktsü agütsür ta aitsübaji tamendakdak maka, ta Manipur nung Sagolband Assembly Constituency MLA, RK Imo-i ashi.
Paisa, telok ana (India sorkar aser NSCN-IM) tsüngda telemtetba agiba nung Manipur nunger litsü amshira aser temulung yirutsüra magizüktsü, ta ashi.
Yashi Keisampat Mutum Leikai nung community hall lapoktsüba sentong nung jembidang MLA-i item o jembia liasü.
Iba tenangzüktep atema inyakba mapa tiyongtsü nung sorkar nokdaktsü tebilemba mali aser ano NSCN (IM)-i Nagaland azüoknüa lira, iba nungjia sorkari tiyongtsüi aittsü tebilemba mali, saka iba tenangzüktepji Manipur raksatsütsü aser nüburtem tsüngda tesentaktep raksatsütsü atema masütsüla ta NPF aser NSCN (IM)-i metettsüla, ta Manipur MLA-isa ashi.
Ajisüaka, Manipur litsü aser temulung yirutsütsüsa inyakba mapa anemabo sorkari akhangakhanga nokdaktsü, ta paisa shisem.
RK Imo-isa, state sorkari tenemlen aliba tesemtem nung terenlok mapatem sentoker ta aitsübaji tai, ta shiogo.
Pai, NPF MLA temi sodi meshiba shidi Manipur Legislative Assembly Speaker nem agütsüogo aser iba mapang nungjagi parnok Assembly sendeni marur, ta ashi.
Ajisüaka parnoki itasen maneni agir aser state sorkari agütsüba tajangzük ajak agir. Parnok mapa nungi anener süra parnoki itasenji magizüktsüla aser state sorkari agütsüba tajangzüktemji-a magitsüla, ta paisa ashi.
Iba sentong nung Yumjao Lairembi Development Committee Tir, Mutum Nilakomon aser ward no. 8 Counselor, K Tikendro nata dena liasü.

You must be logged in to post a comment Login