NPF-i Y Patton tenüng menüktsütsü meranger: BJP

Dimapur, Rongchii (April) 11 (TYO): Deputy Chief Minister aser Home Minister Y. Patton-i dang DGP Rupin Sharma melentsü meranger ta opposition NPF-i tai tongloktsübaji temenünütsüka lir ta Bharatiya Janata Party (BJP)-i metetdaktsü.
Y. Patton ya BJP Legislative Party lennir lir aser regional party tejen ta ajar telok kati pa dak dang tai tongloktsütsü ta meimla aser iba ya kija ka dak tenük yoka mapa inyakba lir, ta BJP-isa ashi.
Dr Shurhozelie-i mapang tatsüka chief minister inyakdang pai Prime Minister dang taoba CM TR Zeliang-i DGP Nagaland inyaktsü atema Lungriading Zeliang asüngdangba pusema nungiter ta shidi ka zülu. Mongputeni (October) 31, 2017 nunga taoba CM TR Zeliang-isa Union Home Minister Rajnath Singh dang Nagaland cadre nung IPS ketdangser peria mali anungji DGP inyaktsü atema tanga cadre nungi ketdangsertem yokang ta shidi ka zülu. Iba mapangji Y. Patton ya NPF party nungi Home Minister teinyakdak liasü, ta Media Cell sangdong ka nung ashi.
PDA sorkar akümba sülen Metsüremi (March) 24, 2018 nü Chief Minister, Neiphiu Rio-i Union Home Minister Rajnath Singh dang ketdangser tejen ka Nagaland DGP inyaktsü atema yoktsü atema mepishi aser iba atema Lungriading Zeliang deputation nung yok nung ajungtsü ta shidi ka zülu.
Ano, Metsüremi (March) 27, 2018 nü Chief Secretary Temjen Toy-ia Union Home Secretary dangi kasa onük atema shidi ka zülu. Iba sülen Metsüremi (March) 28, 2018 nü Y. Patton-ia state sorkar tenüng nung Union Home Minister Rajnath Singh dangi kasa onük atema shidi ka zülu.
BJP-i kija mesüra ketdangser shinga tsütsü shia meinyaker saka ozü lennir dang tuteta tai tongloktsüba atema tebilemtsü abener. Temalen shia aliba onüktem aser kulitem nung ajemdaker iba onük ya tawa tasen adokba onük ka masü saka tejen lir ta asenoki angaeteter. Anungji nisung ka dak dang tai tongloktsübaji magizüker, ta BJP-isa metetdaktsü.
NPF-i BJP lennir ka dang tai tongloktsüba ajanga parnoki sorkar ketdangsüba tashi manguba atema kanga jashiba dang tali jungkai adoka sayur, ta parnokisa ashi.