NPF kibur mali; Naga nunger ajak meyong

Dimapur, Luchii (December) 2 (TYO): NPF party ya Naga nunger indang lir anungji kibur shinga mali ta taoba Chief Minister aser Naga People’s Front President, Dr. Shürhozelie Liezietsu-i ashi.
NPF Phek division-i ‘Regional Principle and Ideology’ onük nung ajemdaker anogo ka shisatokden sentong ka ayonga agidang Dr. Shürhozelie-i ashiba agi, “Nagaland nung regional political party aika tentetogo aser sama ogo, saka NPF ya Naga nunger kümzüktsü atema tentetba lir aser Naga yimten melatet tashi alitsü. NPF-i teti Naga yimten tebilemtsü atema aser Naga nunger maitsü kümzüka atema inyaka arur.”
Naga lennirtemi aikati sen aser tashi meimba ajanga political party ka nungi ka melenshia senzür saka Naga lima meimba chichiba lennir kati NPF party nungi masetshitsü. Tesüiba mapang Nagaland nung regional political party aika tangatetba aser alizüng tajung maliba ajanga loksa ao aser tang Nagaland nung sorkar kümteta aliba NDPP ya-a kobi melii samatsü, ta paisa shisem.
“Tsüngremi Naga nunger meimer saka asenok sen aser tashi aginüba agi tenük poka lir. NPF lennirtem akangakanga noktaktsüla aser Naga nunger asoshi inyaktsü nangzükba ama merangtsüla. Politics nung takok aser tamakok ajurutsü saka Tsüngremi ochi posemer anungji Naga lennirtemi tangatetba tajung nung noktakba nungi masetshitsüla” ta Dr. Shurhozelie-isa ayongzük.