NPF Legislators & senior party lennirtem külem senden amen

Dimapur, June 1 (TYO) : June 1, 2016 nü State Banquet Hall nung NPF yimsüsürtem aser senior party lennirtem külem senden ka amendang NPF Disciplinary Action Committee-i Lok Sabha MP Neiphiu Rio aser MLA Imkong L. Imchen na party nung anenja atatsü telemtetba agiba aser Party President Dr Shurhozelie-i tetuyuba agütsüba pusema nungiter ta bangzünga renem, ta NPF Legislature Party Spokesperson, Yitachu-i sangdong ka nung metetdaktsü.
“Iba telemtetba ya party ajungtsü atema aser NPF-i aniba DAN sorkar akangshitsü atema agiba ta onoki rajema angajemer. Maneni, senden nung adenertemi NPF President Dr Shurhozelie Liezietsu aser Chief Minister TR Zeliang na pusema nungittsü bangzünga renem,” ta Yitachu-isa sangdong nung shia lir.
Senden nung yimjung atema mapa inyakba pusema nungittsü aser Naga nunger ajaki agizüktettsüsa aser akhümtsübutsüsa telemtetba ka agitsü atema inyaktsü tangatetba nungi masetshii noktaktsü lemtet, ta paisa shisem.