NPF Legislature Party aser DAN Legislature Party senden kaogo

Kohima, Dec. 10 (TYO): Dec. 10, 2015 anüngdang 11:30 ako nung Chief Minister’s Banquet Hall nung NPF Legislature Party senden kaogo aser iba mapang bangzüng kar renema yuogo, ta NPF Legislature Party Otongdar, Yitachu-i sangdong ka nung ashi.
NPF Legislature Party-i taoba mapang INC MLA 8, NCP MLA 1 aser JD (U) MLA 1 nungeri NPF yimtenren telok nung züklokba pelaa agizüker, aser ibaji ajanga NLA menden 60 nung NPF Legislature telok nungi MLA 48 tashi akümer, ta Yitachu-i ashi.
Maneni NPF Legislature Party lenir, TR Zeliang nungittsü, aser tawa party Tir, Dr Shurhozelie Liezietsu-i 2018 küm dak tema TR Zeliang-i NPF Legislature Party anitsü ta sangdongbaji pelaa agizük, ta paisa ashi.
DAN teloktep nung Independent MLA tem densema yimtenren party ajak tesentaktep shitak ayutsü lemtet, ta kasa sangdong nung shia lir.
Ano tanga sangdong balaka nung DAN Legislature Party otongdar Yitachu-i, Dec. 10, 2015 anüngdang 12:00 ako nung State Banquet Hall nung Democratic Alliance of Nagaland (DAN) Legislature Party senden amenba mapang bangzüng kar renema ayu, ta ashi.
Land & its resources, 2010 onük nung Nagaland Legislative Assembly-i renemba bangzüng aser 2012 küm lateta aliba Nagaland Petroleum & Natural Gases temzüng ozüngtem maneni nungittsü lemtetogo, ta DAN Legislature Party otongdar, Yitachu-i ashi.
Naga yimtenren ken o tebilemtsü atema maneni Centre nung lenirtem aser Opposition lenirtem naprong ajurua jembitsü aser yimtenren tebilemtsü tekaraba nung latettsü asoshi mepishitsü lemtet, ta paisa ashi.
Hornbill Festival 2015 takok ngua katetba atema sorkar department balala aser shilem agir melungtet telok balala dang pelaba züluoka ayutsü bangjema ayu, ta kasa sangdong nungsa shia lir.