NPF Legislature Party-i metetdaktsür

Dimapur, Mongputeni (October) 6 (TYO): October 6, 2018 nü NPF Legislature Party senden ka amendang September 18 aser 20, 2018 anogotem 2 buba Assembly Session agiba meyipa reprangshi.
Assembly nung Speaker-i mapa tim mesüi inyak aser iba jagi assembly tiptema magitet. Kechiyong September 18, 2018 nü business list nung No. 1 nung tasürtem bilemtetba aser No. 2 nung Question Hour liasü aser iba mapang Leader of the House-i tasürtem bilemtetba mapang minute 37 aser Leader of the Opposition-i minute 15 agi. Ajisüaka, Speaker-i item no.1 aser item no.2 ka küma loktepba ajanga Question Hour atema minute 8 dang agütsü, ta NPF Legislature Party-i sangdong ka nung metetdaktsü.
Iba ya opposition bench-i asüngdangbatem asoshi telangzüba magütsütsü atema asaa inyakba mapa ka liasü. Ano, Assembly secretariat nung ketdangsertemia teinyaktsü tim meinyak, ta parnokisa tai tongloktsü.
NPF züngsemtemi tasüngdangba 50 asüngdangba nungi aika züngdoker 28 dang agizük saka ano telangzüba karbo magütsü. Talisa Leader of the House dena Minister In-charge temi tasüngdangba aika melangzü aser item rongnung Civil Engineers Enterprise Pvt. Ltd. (CEEPL)-i ashiba anema affidavit magütsüba liasü, ta NPF Legislature Party-isa ashi.
Tang rongdak nüngdakba Citizenship Bill 2016 aser Brahmaputra Board asoshi NPF-i asüngdang saka Speaker-i item onükji state indang masü saka Centre indang onük ta shia züngdok.
October 4, 2018 nü NDPP Media and Communications Committee-i sangdongba agütsüba nung tiyazü osangtem metetdaktsüba NPF Legislature Party-i aitsür. Onok NPF legislature Party Leader T.R. Zeliang aser NPF President Dr. Shurhozelie Liezietsu lenisüba kübok akangakanga noktaka lir, NPF Legislature Party-i sangdong nungsa metetdaktsü.
NPF Party sasep nung mangatettep kecha mali aser NDPP-i NPF telok nung telemsa adokdaktsütsü atema inyakba mapa takok mangutsü, ta parnokisa shisem.
Assembly session agidang Leader of Opposition T.R Zeliang-i Naga yimten tebilemtsü atema Joint Legislature Forum (JLF) tentetshitsü asüngdangdang Speaker-i agizükba atema pelar, ta NPF Legislature Party-isa ashi.