NPF legislature party-i senden nung medentettsü

Dimapur, Monupii (May) 8 (TYO): Nagaland Chief Secretary, Temjen Toy-i Rongchii (April) 30, 2018 nü sangdong ka nung Monupii (May) 11, 2018 nü Tribal Hoho ajak den Political Affairs Committee senden ka amentsü ta metetdaktsü.
Senden nung yimjung olemtep aser ULBs nung tetsür nem shilem lemzüktsüba onüktem jembitsü aser Hoho shia nungi Ketdangpur/Züngsem asemsem adentsü jaoker ta sangdong nung shia lir, ta MLA, Imkong L. Imchen-i sangdong ka nung ashi.
Ano, Commissioner & Secretary Nagaland Legislative Assembly Secretariat Kohima, N. Benjamin Newmai-ia sangdong ka nung Monupii (May) 9, 2018 anepdang 11:00 ako nung State Banquet Hall nung PA den MLA tem ajak senden ka amentsü aser iba nung Naga yimten tebilemtsü dak sendakba onük jembitsü ta metetdaktsü.Taoba mapang ruling party-i opposition dang senden amentsü atema anogo latettsü atema asüngdangya asü aser Speaker-isa senden amentsü jatep.
Metsüremi (March) 2018 Budget Session nung Opposition lennir T. R. Zeliang-i Assembly nung Speaker dang Legislator Forum for Naga Political issue senden ka amentsü jazüktsü mepishia liasü. Ajisüaka, iba sendenji mejazük, anungji NPF Legislature party-i senden nung medentettsüsa akümer, ta Imkong-i sangdong ka nung metetdaktsü.
Speaker majangi senden jazükba nung NPF Legislature party medentettsü aser talisa iba dak sendakba nung Opposition lennir nem osang kecha mesangoktsü, ta paisa shisem.